სახელმწიფო ინსპექტორის სამსახური საქმეში საია-ს მიმართვის საფუძველზე ჩაერთო. ახალგაზრდა იურისტები სირაძეების ოჯახის ინტერესებს წარმოადგენენ. ორგანიზაციის თავმჯდომარის განცხადებით საქმეში მხოლოდ ერთი პირის დანაშაული არ იკვეთება და აუცილებელია ყველა მონაწილე პირი უმკაცრესად დაისაჯოს. საია ინსპექტორის სამსახურს ობიექტური გამოძიებისკენ მოუწოდებს.
“მხოლოდ ერთი პირი არ არის ამ საქმეში, ვინც შესაძლოა იყოს შემხებლობაში, ჩვენ გვინდა, რომ ყველამ აგოს პასუხი, გამოძიება არ იქნება მარტივი და ეს არ არის იოლი საქმე, თუმცა ჩვენ სწორედ იმისთვის გვჭირდება სახელმწიფო ინსპექტორის სამსახური, რომ რთულ და მნიშვნელოვან საქმეებზე მიიღოს ობიექტური გადაწყვეტილება,”- განაცხადა საიას ხელმძღვანელმა სულხან სალაძემ.
მოზარდი, რომელმაც რამდენიმე დღის წინ თვითმკვლელობა სცადა, გუშინ საავადმყოფოში გარდაიცვალა. 15 წლის ლუკა სირაძე მე-9 სართულიდან 12 დეკემბერს გადმოხტა. ამ ფაქტს წინ უძღოდა “მწვანე სკოლის” ტერიტორიაზე გაკეთებული წარწერები, რომელთა გამოც მოსწავლე მოწმის სახით დაკითხეს. ოჯახის წევრების და უფლებადამცველების თქმით, მოზარდზე პოლიციის მხრიდან ფსიქოლოგიურ ზეწოლა განხორციელდა.