ხატია დეკანოიძემ და ელენე ხოშტარიამ საკრებულოს შენობა გვიან ღამით დატოვეს. ისინი იმედოვნებენ, რომ ერეკლე კუხიანიძე საბოლოოდ თანამდებობას და საკრებულოს დატოვებს და პასუხისმგებლობას მმართველ გუნდს აკისრებს.
“ლუკას გარდაცვალებასთან დაკავშირებით, ჩვენ მივიღეთ გადაწყვეტილება, რომ დავტოვოთ დღეს საკრებულოს შენობა. ახლა არის ის დრო, როდესაც ყველამ ძალიან კარგად უნდა გავიაზროთ, რომ ყველა დამნაშავე დასასჯელია და გადადგეს შინაგან საქმეთა მინისტრი. ჩვენ დავტოვებთ საკრებულოს შენობას, მაგრამ არავის არ ეგონოს, რომ ეს პროტესტი შეწყდება, არავის არ ეგონოს, რომ კუხიანიძის ამბავი ვინმეს დაავიწყდება,” – განაცხადა ხატია დეკანოიძემ.
პარლამენტის ფრაქცია “ევროპული საქართველოს” წევრი, ელენე ხოშტარია ამბობს, რომ გაგრძელდება თუ არა მათი პროტესტი, ერეკლე კუხიანიძესთან დაკავშირებით უმრავლესობის გადაწყვეტილებაზეა დამოკიდებული.
“ცხადია, იმ გადაწყვეტილების მიხედვით, რომელიც იქნება მიღებული, ჩვენ გვექნება რეაქცია. თუ ისინი მაინც შეეცდებიან, რომ გამოძვრნენ ამ ვითარებიდან და არ დასაჯონ ეს ადამიანი, კიდევ უფრო მწვავე პროტესტს მიიღებენ,” – განაცხადა ელენე ხოშტარიამ.