გუშინ, გვიან ღამით, წალენჯიხის ცენტრში შეიარაღებული დაპირისპირება მოხდა. ვინ გახსნა ცეცხლი და რას მოყვა დაპირისპირება- უცნობია.შსს-ს ინფორმაციით, დაკავებულია ერთი სამართალდამცავი, სხვები კი ამ დრომდე იძებნებიან. ადგილობრივებს ფაქტის დადასტურებაც უჭირთ. რაც შეეხება დაკავებული ბესო ფიფიას ოჯახს, ისინი დეტალებთან დაკავშირებით ინფორმირებული არ არიან, იციან მხოლოდ ის რომ, გუშინ ინციდენტამდე ბესო ფიფიამ ჩაიტარა სამედიცინო კვლევა, ამის შემდეგ ის გამოიძახეს სამსახურში, იყო მორიგე წალენჯიხაში, გვიან ღამით კი გაიგეს ინფორმაცია მისი დაკავების შესახებ. ოჯახის ინფორმაციით, თავად ფიფია დუმილის უფლებას იყენებს, რადგან ის ამ დრომდე არ შეხვედრია ადვოკატს, ოჯახის წევრები ადვოკატთან შეხვედრის შემდეგ მიიღებენ დეტალურ ინფორმაციას.ერთადერთი, რასაც ოჯახი ამბობს, არის ის, რომ ბესო ფიფია სარგებლობდა რაიონში კარგი რეპუტაციით.ის არის საკმაოდ გამოცდილი პოლიციელი, ის უკვე 12 წელია უწყებაში მუშაობს.გარდა ფიფიასი, დაპირისპირებაში კიდევ ორი ადამიანი მონაწილეობდა, ესენია- ირაკლი ნაჭყებია და მამუკა ქარდავა. თუმცა, ამ ადამიანებთან დაკავშირებით წალენჯიხის პოლიცია ინფორმაციას არ ასაჯაროვებს. საქმეს სამეგრელოს საოლქო პროკურატურა იძიებს. განზრახ მკვლელობის მცდელობის ფაქტზე გამოძიება სისხლის სამართლის კოდექსის 19-108-ე მუხლით მიმდინარეობს. რაც შეეხება მანქანას, ეს არ არის პოლიციის მანქანა, ეს არის ერთ-ერთი პოლიციელის პირადი მანქანა.შემთხვევა წალენჯიხის ცენტრში მოხდა.ფაქტს ადასტურებს წალენჯიხის მერის მოადგილე ცოტნე შონია.