ენგურის ხიდზე მიმოსვლა აღდგენილია აფხაზური მხარის მიერ ენგურის ცენტრალურ ხიდზე დაწესებული შეზღუდვები დღეს დილიდან მოიხსნა. ამის შესახებ გავრცელებულ ინფორმაციას სამეგრელო-ზემო სვანეთის რეგიონში აფხაზეთის ავტონომიური რესპუბლიკის მთავრობის წარმომადგენლობაში ადასტურებენ. მურმან მალაზონიას განმარტებით, ხიდზე მიმოსვლის აღდგენა, ენგურს გაღმა მცხოვრებ მოსახლეობას პრობლემებს მოუხსნის. ექვსთდღიანი შეზღუდვა ენგურის ხიდზე მხოლოდ მამაკაცებზე ვრცელდებოდა, ე.წ სასაზღვრო ზოლიდან ქალებსა და ბავშვებს ატარებდნენ. აფხაზეთთან დამაკავშირებელ ერთადერთ ხიდზე მიმოსვლასთან დაკავშირებული შეზღუდვები, სავარაუდოდ სოხუმში 22 ნოემბერს მომხდარ მკვლელობას უკავშირდებოდა.