პარლამენტის ეზოში დილიდან სამართალდამცველების მობილიზებაა. საკანონმდებლო ორგანოს ეზოში პოლიციის ავტომობილები დგას. ადგილზე, ასევე, მობილიზებულია შსს-ს განსაკუთრებულ დავალებათა დეპარტამენტის რამდენიმე ავტობუსი, 112-ის, სასწრაფო სამედიცინო დახმარების და სახანძრო მანქანები.
შეგახსენებთ, რომ ოპოზიციის წარმომადგენლები, მათი მხარდამჭერები და აქტივისტები დღეს პარლამენტთან აქციას გამართავენ. იგეგმება საკანონმდებლო ორგანოს პიკეტირებაც. ოპოზიციის განცხადებით, ისინი უმრავლესობას 26 ნოემბრის პლენარული სხდომის ჩატარების საშუალებას არ მისცემენ.
საართალდამცველების უპრეცედენტო რაოდენობა დგას „ქართული ოცნების“ ოფისთანაც, სადაც უმრავლესობის სხდომა უნდა გაიმართოს. აქ ადრე დილიდან მივიდნენ სამოქალაქო მოძრაობა „შეცვალეს“ წევრები ხელში ტრანსფარანტებითა და საყვირებით . აქტივისტებმა ე.წ. სირცხვილის კორიდორი გააკეთეს და უმრავლესობის წარმომადგენლებს ელოდებიან. „ბიძინა, ჩვენ ისევ მოვედით“ – ამ შეძახილებით აქტივისტები მმართველ პარტიას დანაპირების შესრულებას სთხოვენ და აცხადებენ, რომ მხოლოდ ვადამდელი პროპორციული არჩევნების ჩატარების შემთხვევაში ჩათვლიან მიზანს მიღწეულად.
„როგორც შევპირდით მოსახლეობას, ყველა ნაბიჯს, რომელსაც „ქართული ოცნება“ გადადგამს, ჩვენ გავაკონტროლებთ. რა თქმა უნდა, ჩვენ მორიგ „ტრიუკს“ არ შევჭამთ. ბიძინა ივანიშვილის „ოცნებას“ სავარაუდოდ დარჩა რამდენიმე დღე და მივმართავ მოსახლეობას გამოდით და ერთად გავაკეთოთ ჩვენი გასაკეთებელი საქმე“, – განაცხადა მოძრაობა „შეცვალეს“ ერთ- ერთმა წევრმა.
მოძრაობა “სირცხვილიას” აქციის მონაწილეების თქმით, პროპორციული საარჩევნო სისტემის პროექტის ჩავარდნა, ხელისუფლების მხრიდან დაცინვაა.
მათივე თქმით, დღევანდელი აქცია მშვიდობიანი და იქნება ასევე მშვიდობიანად მოხდება პარლამენტის პიკეტირება.
“რეპრესიები გრძელდება დაშინების მიზნით, სწორედ ამიტომ დააკავეს რურუაც. 25 ნოემბერს მასშტაბური აქცია ჩატარდება დ ეს იქნება პასუხი ივანიშვილს. სიცოცხლეს გავუმწარებთ, ეს დაკავებები ჩვენ პროტესტს ზიანს ვერ მიაყენებს. საზოგადოების გაერთიანება შეასრულებინებს დაპირებას,”- განაცხადა შოთა დიღმელაშვილმა.