ხმაური და დაპირისპირება იყო ფოთის მერიის ადმინისტრაციულ შენობასთან. „ნაციონალური მოძრაობისა“ და „ევროპული საქართველოს“ წარმომადგენლები ვადამდელი არჩევნების პროპორციული სისტემით ჩატარების მოთხოვნით აქციას მართავდნენ.
აქტივისტებს ადგილზე „ქართული ოცნების“ მხარდამჭერები და საჯარო მოხელეები დახვდნენ, რომლებმაც აქციის მონაწილეებს ცოცხები ესროლეს. ვითარება არაერთხელ დაიძაბა. ვითარება ადგილზე მობილიზებულმა პოლიციამ განმუხტა.
” სულ რაღაც 30 კაცამდე მოვედით და მთელი საჯარო სივრცე აქაა მობილიზებული, არ გვაძლევენ პროტესტის გამოხატვის უფლებას, მოდიან პროვოკაციაზე“,- განაცხადა „ევროპული საქართველოს“ წევრმა, გიორგი შამუგიამ.
ამის შემდეგ აქციის მონაწილეებმა ფოთის რაიონულ პროკურატურასთან გადაინაცვლეს, თუმცა პოლიციამ ბოქლომის დადების საშუალება არ მისცა, რასაც კვლავ ხმაური და დაპირისპირება მოჰყვა.
„ნაციონალური მოძრაობის“ საქალაქო ორგანიზაციის თავმჯდომარემ, დარეჯან ცხვიტარიამ, ბოქლომი პროკურატურის ეზოში შეაგდო.
„დღეს ვერ შევძელით ვერცერთი შენობის დაბოქლომება, მაგრამ ჩვენ არ გავჩერდებით. ეს პროცესი გაგრძელდება, აქციებს არ შევწყვეტთ და მიზანს მივაღწევთ“,- განაცხადა დარეჯან ცხვიტარიამ.