თუ ეს კანონი ჩავარდა, ეს იქნება ბიძინა ივანიშვილის უკანასკნელი ტყუილი, – ამის შესახებ ფრაქცია „ნაციონალური მოძრაობის“ თავმჯდომარემ, რომან გოცირიძემ ჟურნალისტებს საარჩევნო სისტემასთან დაკავშირებულ კანონპროექტზე განუცხადა.
რომან გოცირიძემ აღნიშნა, რომ გადამწყვეტი იქნება, რა სიგნალებს მიიღებს ბიძინა ივანიშვილი დასავლეთისგან. როგორც მან აღნიშნა, ამ საკითხთან დაკავშირებით, ბიძინა ივანიშვილმა ელჩები მოატყუა.
„ჩვენ არაერთხელ მოგვისმენია ბიძინა ივანიშვილის მრავალ მილიარდიანი ტყუილები. ეს ტყუილი, რომელიც მან საზოგადოებას გადმოუგდო, უკვე არ იზომება მილიარდებით და მილიონებით. ეს არის სხვა მასშტაბის ტყუილი. თუ ეს კანონი ჩავარდა, ეს იქნება ბიძინა ივანიშვილის უკანასკნელი ტყუილი. წარმოუდგენელია, რომ ორი თვის წინ 93-მა დეპუტატმა მოაწერა ხელი და შემდეგ იმ ადამიანების ნაწილს ღირსების გრძნობა აღუდგა და თურმე ივანიშვილის საწინააღმდეგოდ პოზიცია გამოხატა. არ ხდება ასე, იქნება ის გადაწყვეტილება, რასაც იტყვის ივანიშვილი. ჩავარდება? – ეს იქნება მის მიერ მოწყობილი მორიგი კლოუნადა, რაც გააკეთა ერთხელ უკვე ქუთაისში, როცა კონსტიტუცია ჩააგდო ფაქტობრივად ე.წ. მაჟორიტარების ბუნტის სახით. ამ სისტემის გასვლა-არგასვლის საკითხი დამოკიდებულია ივანიშვილზე ზემოქმედების ფორმაზე, რა სიგნალებს მიიღებს დასავლეთისგან“, – განაცხადა რომან გოცირიძემ