დღეს ზუგდიდის რაიონულ სასამართლოში ტელე-რადიო კომპანია „ოდიშის“ გადაცემა „რეალობის“ წამყვანის, ჟურნალისტ ლევან თორიას, მორიგი სასამართლო პროცესი გაიმართა. ლევან თორიას წინააღმდეგ სისხლის სამართლის საქმე ძალადობის ფაქტზე, 126-ე მუხლის პირველი ნაწილით არის აღძრული. თბილისის საკრებულოს წევრი „ერთიანი ნაციონალური მოძრაობიდან“ ნიკა ვაჩეიშვილი განმარტავს, რომ წინასაარჩევნო კამპანიის პერიოდში ჟურნალისტზე სპეციალურად დაგეგმილი თავდასხმა მოხდა. „აბსურდის თეატრი“, – ასე აფასებს თავად ლევან თორია მიმდინარე პროცესს და დასძენს, რომ „ მრავალგზის მოთხოვნის მიუხედავად პროკურატურამ გამოძიება არ დაიწყო ჟურნალისტისთვის პროფესიული საქმიანობის ხელშეშლის მუხლით, რაც ადასტურებს პროკურატურის მხრიდან პოლიტიკურ დაინტერესებას“,- აცხადებს თორია. დღევანდელ სასამართლო პროცესზე დაცვის მხარის მოწმეები დაიკითხნენ და მათ დაადასტურეს, რომ ლევან თორია თავდაცვით მდგომარეობაში იმყოფებოდა. მომდევნო სასამართლო პროცესი 21 ნოემბრისთვის ჩაინიშნა.