ჭყონდიდის ეპარქიის ყოფილმა მიტროპოლიტმა პეტრე ცაავამ ეპარქია დატოვა და თბილისში გამოემგზავრა. ყოფილ მიტროპოლიტთან ერთად რეზიდენცია იმ ოთხმა მონაზონმაც დატოვა, რომლებიც აქ წლების განმავლობაში მსახურობდნენ.
“სადაც ჩვენი მოძღვარი იცხოვრებს, ჩვვენც იქ ვიქნებით,”- ასე უპასუხა იღუმენია თამარ გამყრელიძემ “კურიერს” კითხვაზე, თუ სად გააგრძელებენ ისინი ღვთისმსახურებას.
“სამწუხაროა ყველასთვის, რომ მეუფე პეტრე ჭყონდიდის ეპარქიას ტოვებს, ძალიან მტკივნეულია ეს ყველა ჩვენგანისთვის. ჩვენ გვაქვს ჩვენი ტიპიკონი ჩვენი წესები მონასტრის და გავაგრძელებთ ჩვეულებრივ ცხოვრებას,”- განუცხადა “კურიერს” მონაზონმა სოსანა ბოლქვაძემ.
მორჩილი ნინოს თქმით, ისინი არ დაესწრებიან ღვთისმსახურებას და ამ ფორმით გააპროტესტებენ მეუფე პეტრე ცაავასთვის მღვდელმთავრის სტატუსის ჩამორთმევას.
რეზიდენციის დატოვებამდე მეუფე პეტრე ცაავამ მედიასთან განაცხადა, რომ ის არ ნანობს არაფერს, რაც სრულიად საქართველოს კათოლიკოს პატრიარქზე, ილია II-ზე თქვა. ჭყონდიდის ყოფილი მიტროპოლიტი ელოდება, რომ შესაძლოა უსამართლობის მსხვერპლი კიდევ ერთხელ გახდეს და ამჯერად არ გამორიცხავს, რომ შესაძლოა, ის ეკლესიიდან მოკვეთონ კიდეც. ეპარქიის დატოვების დროს, ბოლოს გაკეთებულ განცხადებაში მან საქართველოს პრეზიდენტიც გააკრიტიკა და ფარისევლობაში დაადანაშაულა.