ნაწულუკუში ავარიის ავარიის დროს დაშავებული ერთ-ერთი ახალგაზრდა მამაკაცი ნიკოლოზ ივარდავა კატასტროფის ბრიგადამ წუხელ თბილისში გადაიყვანა. ზუგდიდის რეფერალური საავადმყოფოს კლინიკური დირექტორის სულხან ორჟონიას ინფორმაციით, ახალგაზრდა მამაკაცი თბილისში ოჯახის მოთხოვნით გადაიყვანეს, რაც შეეხება 2 ახალგაზრდა ქალბატონს, რომლებიც ასევე, ავარიისას დაშავდნენ, ადგილზე რჩებიან, მათი მდგომარეობა კრიტიკულია.
„რაც შეეხება ორ ქალბატონს, ისინი რჩებიან რეანიმაციულ განყოფილებაში, ორივე მათგანს ჩაუტარდა ტრეპანაცია, მათ სიცოცხლეს ამ წუთის მდგომარეობით საფრთხე ემუქრება, ორივეს მდგომარეობა უმძიმესია“- განაცხადა ორჟონიამ.
ავტოსაგზაო შემთხვევას, რომელიც გუშინ ნაწულუკუს გზაზე მოხდა, ერთი მამაკაცის სიცოცხლე ემსხვერპლა და სამი ახალგაზრდა მძიმედ დაშავდა.ავარიას რამდენიმე თვითმხილველი ყავს, ერთ-ერთი მათგანი აცხადებს, რომ თვითონაც მანქანით მოძრაობდა, რა დროსაც შენიშნა, საპატრულო მანქანა როგორ მისდევდა იმ მანქანას, რომელიც მის თვალწინ ამობრუნდა და მძღოლი ადგილზევე გარდაიცვალა. შს სამინისტროს ინფორმაციით, აღნიშნულთან დაკავშირებით გამოძიება 276-ე მუხლის მე-6 პუნქტით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ადამიანის სიცოცხლის მოსპობა გამოიწვია.