დეპუტატ ემზარ კვიციანისგან ფიზიკური ძალადობის გამო მოძრაობა ,, ქვეყნის სამსახურში” წევრი, ზუკა ბერძენიშვილი დაზარალებულის სტატუსის მინიჭებას ითხოვს. მან განცხადებით გენერალურ პროკურატურას დღეს, 23 ოქტომბერს მიმართა. საქმე ეხება 8 ოქტომბერს პარლამენტთან მომხდარ შემთხვევას, როდესაც კვიციანმა აქტივისტებს აგინა, შეაფურთხა და დაარტყა.
ბერძენიშვილის თქმით, განცხადებაში დასაბუთებულია ფაქტი, რომ მას უნდა ჰქონდეს დაზარალებულის სტატუსი და ხაზგასმულია ის გარემოებაც, რომ სტატუსის არმინიჭება დაუსაბუთებელია.
“უშუალოდ კვიციანისგან დავზარალდი, მისგან პოლიციელებიც დაზარალდნენ. დარწმუნებული ვარ, რომ სამართალდამცველებისთვის არ არის კომფორტული, რომ მათ თვალწინ ხდებოდეს კანონდარღვევა და ისინი არა კანონის მიხედვით მოქმედებდნენ, არამედ ელოდნენ, რას ეტყვის უფროსის უფროსი, რომ ვინმეს პოლიტიკურ ზედა ეშელონებში რამე არ ეწყინოს”, — ამბობს ბერძენიშვილი.
მისივე განცხადებით, ამ საქმეს პრინციპული მნიშვნელობა აქვს.
8 ოქტომბერს გიორგი გახარიას მთავრობის დამტკიცების დროს პარლამენტთან ცხვრების მიყვანის შემდეგ პატრიოტთა ალიანსის დეპუტატმა, ემზარ კვიციანმა აქტივისტებს სიტყვიერი და ფიზიკური შეურაცხყოფა მიაყენა.