ზუგდიდის მუნიციპალიტეტის სოფელ ნაწულუკუში მომხდარ ავტოსაგზაო შემთხვევას ერთი ადამიანის სიცოცხლე ემსხვერპლა, სამი კი დაშავდა. ერთმანეთს ურთიერთსაპირისპიროდ მიმავალი ოპელისა და ფოლკსვაგენის მარკის ავტომობილები შეეჯახა. შეჯახების შედეგად ოპელის მარკის ავტომობილს ცეცხლი გაუჩნდა და საახანძროს მოსვლამდე მთლიანად დაიწვა. მანქანის მძღოლი, 60 წლამდე ასაკის მძღოლი გარდაცვლილია.
თვითმხილველთა ცნობით, მის მანქანას საპატრულო ეკიპაჟი მისდევდა. ,,მესმოდა, რომ დიდი სისწრაფით მიმავალ მანქანას კვალში ჩამდგარი პატრული მისძახოდა ,,გადააყენე, გადააყენე ! სხვა არაფერი ვიცი” -ამბობს ერთერთი თვითმხილველი
დაშავებულები სასწრაფო სამედიცინო დახმარების სამსახურმა ზუგდიდის რეფერალურ საავადმყოფოში გადაიყვანა. მათ ამ წუთებში სამედიცინო გამოკვლევები უტარდებათ.
საავადმყოფოს მედპერსონალი დაშავებულთა მდგომარეობას აფასებს როგორც ძალიან მწვავეს. კლინიკური მენეჯერი სულხან ორჟონია ,,ოდიში ნიუსისთვის” გაკეთებულ კომენტარებში აღნიშნავს, რომ შემოყვანილი სამი ახალგაზრდიდან ორი მართვით სუნთქვაზე იმყოფება და წინასწარ პროგნოზის გაკეთება რთულია. მესამე ახალგაზრდის მდგომარეობაც მძიმეა.
ამ დროისათვის გარდაცვლილიცა და დაშავებულებიც იდენტიფიცირებულები არიან, გარდაცვლილი აფხაზეთის საოკუპაციო ზონიდან არის, დაშავებული სამივე ახალგაზრდა კი ზუგდიდის კომპანია ,, გემუანის” თანამშრომელია – ასმათ შენგელია, ნანა თორდია და ნიკოლოზ ივარდავა
შსს ინფორმაციით, მომხდართან დაკავშირებით მიმდინარეობს გამოძიება.