„ეს ქვეყანა შენია!“- კამპანიის პრეზენტაცია გაიმართა ეროვნულ ბიბლიოთეკაში, რომელიც სამოქალაქო საზოგადოების გაძლიერებას ემსახურება. ღონისძიებას ესწრებოდა და შეკრებილებს სიტყვით მიმართა საქართველოში ევროკავშირის ელჩის მოადგილემ კატალინ გერმანიმ, რომელმაც აღნიშნა, რომ ევროკავშირი ამ მიმართულებით საქართველოს ახლო მოკავშირეა.
ორგანიზაცია „სამოქალაქო საზოგადოების განვითარების ინიციატივის“ პროექტის ფარგლებში შესწავლილ იქნა საზოგადოების დამოკიდებულება და სტერეოტიპები, რომელიც გავრცელებულია მოსახლეობაში, როგორც საზოგადოებრივი ორგანიზაციების, ასევე სამოქალაქო ღირებულებების მიმართ. როგორც პრეზენტაციაზე აღინიშნა, აუცილებელია მოსახლეობის გააქტიურება, რადგან ბევრი მოქალაქე არის პასიური, რაც ქვეყანაში მიმდინარე სხვადასხვა პროცესზეც აისახება. კვლევების საფუძველზე შემუშავდა საკომუნიკაციო სტრატეგია. შეირჩა სოციალურად აქტიური ჯგუფები: სტუდენტები, ახალგაზრდობა, სამოქალაქო განათლების პედაგოგები და მედია. განისაზღვრა, რომელი არხების ინსტრუმენტების გამოყენებით ქცევის რა ცვლილება შეიძლება იყოს მიღწეული თითოეულ სამიზნე ჯგუფში.