,,ირმა ნადირაშვილის წინააღმდეგ აუცილებლად შევიტან სარჩელს და ყველა იმ ცრუპენტელას მიმართ ვინც საჯაროდ ხელი დამადო და თითქოს მამხილა კორუფციაში – ამის შესახებ პრეზიდენტის საპარლამენტო მდივანმა დიმიტრი გაბუნიამ გენერალურ პროკურატურაში, გამოკითხვის შემდეგ თქვა.
გაბუნიას თქმით, გამოძიების დასრულებისთანავე, ყველა ის პირი, როგორც თვითონ ამბობს, ცილი დასწამა, კანონის სრული სიმკაცრით დაისჯება.
“ვინც მე დიმიტრი გაბუნია, ჩემი სახელი და გვარი გარია ამ ბინძურ ცილისწამებაში, კანონის სრული სიმკაცრით აგებს პასუხს. პირადად მე შევიტან განცხადებას პროკურატურაში და პირადად მე შევიტან სარჩელს სასამართლოში. ეს თემა ასე არ დამთავრდება. პირადად ჩემთვის არის სიკვდილ-სიცოცხლის საკითხი. როცა ჩემი ოჯახი არის ასეთ დღეში და პირადად მე შემეხო ეს საკითხი. მე არ ვიცი, ვინ დაგეგმა, ვის სჭირდებოდა. მე ვსვამ ამ შეკითხვებს. ვის სჭირდებოდა ჩემი გარევა, როდესაც ყველაფერი გამჭვირვალედ, სტრუქტურულად ნათელი იყო”- ამბობს გაბუნია.
მისივე თქმით, ის გენერალურ პროკურატურას სრულად ენდობა.
“მე დარწმუნებული ვარ რომ გამოძიება, დეტალურად, უმოკლეს ვადებში დადებს დასკვნას და თუ შესაძლო დანაშაულში მხილებული პირები გამოიკვეთნენ, ისინი უმკაცრესად უნდა დაისაჯონ კანონის სრული სიმკაცრით. უნდა დაიკითხოს აბსოლუტურად ყველა პირი. მე განცდა დამრჩა, რომ გამოძიება არის დაინტერესებული გამოავლინოს შესაძლო დანაშაულში მხილებული პირები და 200%-ით ვენდობი საქართველოს გენერალურ პროკურატურას”- აღნიშნა გაბუნიამ
როგორც პრეზიდენტის საპარლამენტო მდივანმა თქვა, გაუთქმელობის ხელწერილი დადო და დეტალურად გამოკითხვაზე ვერ ისაუბრებს.