30 აგვისტო უგზო-უკვლოდ დაკარგულთა საერთაშორისო დღეა, ეს დღე მსოფლიოში 1983 წლიდან აღინიშნება და ამ თარიღს საქართველო 2010 წლიდან შეუერთდა. სწორედ ამ პერიოდიდან ასოციაცია „ქსენონი“და წითელი ჯვრის საერთაშორისო კომიტეტის ზუგდიდის ოფისი ერთობლივი პროექტის „ უგზო-უკვლოდ დაკარგულთა ოჯახების რეაბილიტაცია და გაძლიერება სამეგრელო ზემო-სვანეთში“ ფარგლებში მუშაობენ და ომის შედეგად დაკარგული ადამიანების ოჯახის წევრებს უწევენ მხარდაჭერას და რაც ყველაზე მთავარია მიმდინარეობს უგზო -უკვლოდ დაკარგულების ნეშტის მოძიება, იდენტიფიცირება და გადმოსვენების პროცესი. უკვე მეოთხე წელია, რაც ტრადიციად იქცა უგზო-უკვლოდ დაკარგული ადამიანების სახელობის სკვერში შეკრება, სადაც თავს იყრიან კონფლიქტის შედეგად დაკარგული ადამიანების ოჯახის წევრები და ის ადამიანები, რომლებიც პატივს მიაგებენ მათ ხსოვნას. როგორც ცნობილია, საქართველოში 1990-იანი წლებისა და 2008 წლის აგვისტოს შეიარაღებული კონფლიქტების შედეგად 2400-ზე მეტი ადამიანი დღემდე უგზო -უკვლოდ დაკარგულად ითვლება.