საქართველოს გენერალურ პროკურატურაში ადასტურებენ, რომ სასამართლოს მამუკა ხაზარაძისა და ბადრი ჯაფარიძის ანგარიშების დაყადაღების შუამდგომლობით მიმართეს.

“უკანონო შემოსავლის ლეგალიზაციის ფაქტზე საქართველოს გენერალურ პროკურატურაში 2018 წლის 2 აგვისტოს დაწყებული გამოძიების ფარგლებში, საქართველოს სისხლის სამართლის საპროცესო კანონმდებლობის, საერთაშორისო კონვენციების და რეკომენდაციების შესაბამისად, პროკურატურამ სასამართლოს მიმართა მამუკა ხაზარაძის და ბადრი ჯაფარიძის საბანკო ანგარიშებზე დანაშაულებრივი გზით მოპოვებული ფულადი თანხის, 16 664 000 ამერიკული დოლარის ეკვივალენტის ქონების დაყადაღების შუამდგომლობით.

ამჟამად მიმდინარეობს განჩინების აღსრულებისთვის კანონმდებლობით დადგენილი საპროცესო მოქმედებები

მამუკა ხაზარაძის განცხადებით, დღეს პროკურატურის მოთხოვნით და სასამართლოს განჩინებით, მისი და ბადრი ჯაფარიძის ყველა საბანკო ანგარიში დააყადაღეს. ამის შესახებ ის ფეისბუკის გვერდზე წერს.

“ეს ქმედება ემსახურება მხოლოდ ერთ მიზანს, რომ მოხდეს ჩვენს მიერ დაანონსებული საზოგადოებრივი მოძრაობის და ყველა მიმდინარე დასაფინანსებელი საქველმოქმედო და ბიზნეს პროექტის, მათ შორის ანაკლიის საბოლოოდ გაჩერება.

ვერ შეგვაშინებთ!! ბრძოლას ვაგრძელებთ!!”, – აცხადებს მამუკა ხაზარაძე.