ზუგდიდის მუნიციპალიტეტის მოსახლეობის ნაწილი მიწების დაკანონებას ითხოვს, ამის შესახებ დღეს მაჟორიტარ დეპუტატთან შეხვედრაზე საკრებულოს წევრმა „ქართული ოცნებიდან“ ზურაბ გოგოძემ განაცხადა. მისი თქმით, მიწები თვითნებურად არის მიტაცებული და მათი დაკანონება ვერ ხერდხდება, რადგან ქონებას ეკონომიკის სამინისტრო განკარგავს:
„არის მიწები სოფლებში, რომელიც იმყოფება ეკონომიკის სამინისტროს ბალანსზე და აუთვისებელია, არის მიტაცებული თვითნებურად, სადაც ითესება ერთწლიანი კულტურები. ეს ხალხი ითხოვს ამ მიწების დაკანონებას, რაც საუკეთესო გამოსავალია იმისთვის, რომ სოფლის მეურნეობის პროგრამები ამუშავდეს, მაგ: მოცვის პროგრამა, დანერგე მომავალი და სხვა. პრობლემა ისაა, რომ თვითმმართველობას ამ მიწების განკარგვის უფლება არა აქვს, გამომდინარე აქედან ამ პროგრამების ამუშავება არის შეუძლებელი.“- განაცხადა გოგოძემ. დეპუტატმა მერაბ ქვარაიამ კი აღნიშნა, რომ საკითხის გარშემო საშემოდგომო სესიაზე იმსჯელებენ.
“ამ შემთხვევაში არის ინდივიდუალური ქეისები, სადაც ვეცდებით მოვნახოთ ის გარემოებები, თუ რა აფერხებს ამ მიწების გადაცემას მოსახლეობისთვის და შევეცდებით, გადაეცეს საკუთრებაში მათ ეს ტერიტორია”, – აღნიშნა მერაბ ქვარაიამ.
საუბარია რამდენიმე ასეულ ჰექტარ მიწაზე, რომლითაც სოფლებში მოსახლეობა წლებია სარგებლობს, თუმცა მათი დაკანონება ვერ ხერხდება. „ქართული ოცნების“ მაჟორიტარმა დეპუტატმა საკრებულოს წევრებთან შეხვედრა დღეს გამართა.