კახათის მოსახლეობა სანიაღვრე არხების გაკეთებას ითხოვს.ამის შესახებ საკრებულოს სხდომაზე სოფლის მაჟორიტარმა დეპუტატმა მანანა მებონიამ ისაუბრა, მისი თქმით, აუცილებელია სოფლებს სათანადო ყურადღება მიექცეს. ,,სოფელში არ არის საკანალიზაციო სისტემა, სანიაღვრე არხები და როცა წვიმაა,იტბორება ეზოები და ფეკალური მასები ჩაედინება მდინარეში. მე დავიწყე შეხვედრები მოსახლეობასთან 2020 წლის ბიუჯეტის დაგეგმარებაზე და შევაჩერე, რადგან ვთვლი, რომ არის პრობლემები და საკითხები, რომელიც აუცილებელია მოისმინოს თვითმმართველობის წარმომადგენელმა,, – განაცხადა მანანა მებონიამ. მსგავსი პრობლემის შესახებ ისაუბრა ძველი აბასთუმნის მაჟორიტარმა ედიტა კოდუამ. მისი თქმით, წლებია უშედეგოდ ითხოვენ სანიაღვრე არხების გაწმენდას.,,რამდენჯერ დავწერეთ განცხადება მაგრამ უშედეგოდ.აუცილებელია ყველა კომპანიის გაკონტროლება, ვინც სამუშაოებს აწარმოებს სოფელში. რადგან გაზიფიცირების სამუშაოებისას გადათხრილი ქუჩები ისე დატოვეს და სწორედ ამიტომ შეგვექმნა პრობლემა,, – განაცხადა დეპუტატმა. საკრებულოს თავმჯდომარის მამუკა წოწერიას თქმით, შეუძლებელია ერთდროულად ყველა პრობლემის მოგვარება, ამ ეტაპზე საკმაოდ ბევრი პროექტი ხორციელდება ქალაქში და ეტაპობრივად მოხდება სოფლებშიც გასვლა.