“რუსთავი 2”-ის ახალი მფლობელისთვის, საზოგადოებრივი საბჭოს შექმნაზე თანხმობა იქნება მნიშვნელოვანი ტესტი, არხის სარედაქციო პოლიტიკის დასაცავად – არასამთავრობო ორგანიზაციები და მედია ექსპერტები მზად არიან იყვნენ გარანტი, არხის დამოუკიდებლობის.
მესამე სექტორის წარმომადგენლები ფიქრობენ, რომ ეს მექანიზმი ჟურნალისტებს პოლიტიკური მოტივებით მიღებული შესაძლო ჩარევებისგან დაიცავს, რაც ახალი მენეჯმენტის პირობებში, რეალური საფრთხეა.
არასამთავრობო ორგანიზაცია ”საქართველოს დემოკრატიული ინიციატივას” თავმჯდომარე, გიორგი მშვენიერაძე ამბობს, რომ თუ არხის ახალი მფლობელი სარედაქციო პოლიტიკის შეცვლას რეალურად არ გეგმავს, მას შეუძლია საბჭოს შექმნას დათანხმდეს.
„ეს მის ნება-სურვილზეა დამოკიდებული და ერთგვარად პასუხიც იქნება იმაზე, მას რეალურად რა სურს, სურს სარედაქციო დამოუკიდებლობის შეზღუდვა, შეცვლა, რის ეჭვიც სამართლიანად არსებობს, თუ ის ტოვებს სარედაქციო დამოუკიდებლობას და მისთვის, “რუსთავი 2”-ისთვის ბრძოლა იყო მართლაც დაკარგული ბიზნესისთვის ბრძოლა,“ – განაცხადა მშვენიერაძემ.
ბორდის იდეას დადებითად აფასებს არასამთავრობო ორგანიზაცია ”საერთაშორისო გამჭვირვალობა – საქართველოს” აღმასრულებელი დირექტორი, ეკა გიგაური. ის ამბობს, რომ თუ აღნიშნული ინიციატივა განხორციელდება, შესაძლებელი იქნება სარედაქციო დამოუკიდებლობის შენარჩუნება.
„თუ ჩემს კანდიდატურასთან დაკავშირებით დათანხმება იქნება, ცხადია, მე ამ ბორდში შევალ, მაგრამ რაც ყველაზე მთავარი აქ არის თვითონ ბორდის იდეაა და მე მგონი, ეს ახალმა მფლობელმა უნდა გაითვალისწინოს, რა თქმა უნდა და ამაზე უნდა დაფიქრდეს,“ – განაცხადა გიგაურმა.