ოკუპაციის წინააღმდეგ საპროტესტო აქციის 20 დღე – რუსთაველის გამზირზე ამ წუთებში კვლავ ანტისაოკუპაციო აქციის მონაწილეები არიან შეკრებილები. გუშინდელი დღის შემდეგ, როდესაც პარლამენტის მიმდებარე ტერიტორია ლევან ვასაძის დაჯგუფებამ დაიკავა და რუსთაველზე ორი აქცია გაიმართა, დღეს ახალგაზრდების შეკრება კითხვის ნიშნის ქვეშ იდგა. თუმცა, ანტისაოკუპაციოაქციის მონაწილეებმა და ორგანიზატორებმა მათი მთავარი ლოკაცია დაიბრუნეს და პარლამენტის შენობის წინ არიან შეკრებილები.

ახალგაზრდობა, თითქმის, სამი კვირაა, გავრილოვის სისხლიანი ღამის შემდეგ შინაგან საქმეთა მინისტრის გიორგი გახარიას გადადგომას მოითხოვს. აქციაზე გამომსვლელებმა გუშინ განვითარებული მოვლენები შეაჯამეს და მათი მოთხოვნები კიდევ ერთხელ გააჟღერეს.

„ხელისუფლებამ კიდევ ერთხელ წააგო, ანგარიში ამ ეტაპზე არის 19:0 და დღეს, დღევანდელი მეოცე დღის ბოლოს, ყველა ერთად გამოვაცხადებთ, რომ ანგარიში გახდება საიუბილეო 20:0,“ – აღნიშნა გიგა მაქარაშვილმა.

ფილოსოფოსი, ლევან ღამბაშიძე, რომელიც პარლამენტის წინ აქციაზე იმყოფება, ამბობს, რომ გიორგი გახარია, როგორც პოლიტიკურ ფიგურას, სახელი უკვე გაფუჭებული აქვს. 

„20-ში რაც მოხდა, ამან გამოაცალა გახარიას უფლება მორალური, იყოს ყველას შინაგან საქმეთა მინისტრი, ანუ რაღაცნაირად, პასუხისმგებლობა აიღოს ყველა მის მოქალაქეზე. ეს არის ფუნდამენტური და მნიშვნელოვანი, რაც ყოველთვის უნდა ვიცოდეთ ხოლმე, თუ რატომ არ უნდა იყოს ეს კაცი ჩვენი შინაგან საქმეთა მინისტრი. მომავალში, რაც არ უნდა მოხდეს, ამ ადამიანს, როგორც თანამდებობის პირს, გაფუჭებული აქვს სახელი, ის ვეღარ შეასრულებს თავის ფუნქციას,“ – განაცხადა ლევან ღამბაშიძემ.

გუშინ განვითარებული პროცესები გაიხსენა აქციის კიდევ ერთმა ორგანიზატორმა, შოთა დიღმელაშვილმა.

„ჩრდილოეთ კორეის და სამხრეთ კორეის საზღვარივით იყო ის ყვითელი ავტობუსები, მაგრამ იმ ავტობუსებამდე მოსვლაც ხომ საჭირო იყო და თქვენ რომ არ მოსულიყავით, თითოეული თქვენგანი, არ იქნებოდა ის კრიტიკული მასა,“ – განაცხადა შოთა დიღმელაშვილმა.