„ჩვენ, „ევროპული საქართველო” ვაპირებთ, რომ გადავიდეთ შეტევაზე “ქართული ოცნების“ წინააღმდეგ,“ – ეს განცხადება „ევროპული საქართველოს“ წევრმა, გიორგი კანდელაკმა “არჩევანში” გააკეთა.
„არჩევანის“ ეთერში გიორგი კანდელაკი რუსეთის პრეზიდენტის, ვლადიმერ პუტინის მიერ დაწესებულ ემბარგოს გამოეხმაურა, რომელმაც საქართველოსკენ ავიამიმოსვლა გააუქმა.
გიორგი კანდელაკის თქმით, ქვეყანა რთულ ეკონომიკურ მდგომარეობაში ჩავარდა, თუმცა მან ხელისუფლების წარმომადგენლები გააკრიტიკა, რომლებიც ბოლო დროს ეროვნული ვალუტის გაუფასურებასა თუ ტურისტული ნაკადის შემცირებაში ოპოზიციას აკრიტიკებს.
გიორგი კანდელაკის თქმით, მისი გუნდი უკვე ხვალიდან დაიწყებს „შეტევას“ მმართველი გუნდის მიმართ.
„ამან აჩვენა, რაოდენ სახიფათოა ფსონის დადება ეკონომიკური ფსონის დადება რუსეთზე. რუსი ტურისტები უნდა შემოდიოდნენ, ვაჭრობაც უნდა იყოს, მაგრამ არ შეიძლება ამაზე ვიყოთ დამოკიდებული. ამიტომ, ჩვენ ვაპირებთ შეტევის გაკეთებას ეკონომიკაში, წინადადებებით გამოსვლას – ეს არის აქციზის გაუქმება საწვავზე, რაც მათ შემოიღეს და გააძვირეს საწვავი, ეს არის საპენსიო მავნებლობის, ჯიბეში რომ ხალხს ჩაუძვრნენ, ამის გაუქმება, ეს არის ტურიზმის სფეროში, მართლა, ბევრი ბიზნესი დაზარალდება და მათ რომ შეესმინათ ჩვენი წინადადებები და ქუთაისის აეროპორტი დაგეგმილი მასშტაბით აემუშავებინათ, დღეს ევროპელი ტურისტების რაოდენობა იქნებოდა 5-ჯერ მეტი, რომლებიც ბევრად მეტ ფულს ხარჯავენ, ვიდრე რუსები და ერთწლიანი ჩამორჩენა აქვთ ამ ტერმინალის მშენებლობაში და ჩვენ ხვალ ვაპირებთ, მაგალითად, ტურიზმის სფეროში წინადადებების პაკეტით გამოსვლას და ეკონომიკაშიც უნდა შევუტიოთ ჩვენ,“ – განაცხადა გიორგი კანდელაკმა.