– აქციის მონაწილეები, რომლებიც გიორგი გახარიას გადადგომას ითხოვენ, რესპუბლიკის მოედნიდან მსვლელობით დაიძრნენ.
როგორც აქციის ორგანიზატორები ამბობენ, შეძახილებითა და საყვირებით ავტოკოლონის ნაწილი შს სამინისტროსთან, ნაწილი კი სოლოლაკში, ბიძინა ივანიშვილის რეზიდენციასთან მივა. ასე ეხმიანებიან ახალგაზრდები 20 ივნისის აქციის დარბევის გამოძიების გაჭიანურების საკითხს.
პროცესის გაჭიანურება შესაძლოა შს მინისტრზე ხელის დაფარებას ემსახურებოდეს – ასე აფასებენ უფლებადამცველებიც გამოძიების გაჭიანურების საკითხს.
„ნათელი სურათი არ არის და არ არის მკაფიოდ გამოკვეთილი ვინ იყო ბრძანების გამცემი, იქიდან გამომდინარე, რომ ჩვენ რამდენიმე მაღალი თანამდებობის პირი ვიხილეთ კულისებს მიღმა, რადგან ასეთი ტიპის საზოგადოებრივი ინტერესი არსებობს, მნიშვნელოვანია სწრაფად მოხდეს გამოძიება, შეგვიძლია ვივარაუდებთ, რომ მათ შორის ხელმძღვანელ პირებზე ხელის დაფარება, შეიძლება იყოს პროცესის გაჭიანურების მიზანი,“-ამბობს კონსტიტუციონალისტი კოტე ჩოკორაია.
აქციის მონაწილეებმა დღეს დილით შს მინისტრის ბიუსტი სიმბოლურად წითელ ფერში შეღებეს. ამით მათ მიანიშნეს, რომ 20 ივნისის სისხლიან ღამეზე სწორედ ის არის პასუხიმგებელი.
პარალელურად პარლამენტთან გრძელდება მოშიმშილეთა აქციაც. ერთ კვირაზე მეტია ისინი კარვებში ათენებენ და პროტესტის უკიდურესი ფორმით ითხოვენ მინისტრის გადადგომას. ამ დროისთვის რუსთაველზე 3 მოშიმშილე რჩება.
„ჩვენ მუდმივად ვცდილობთ იმედი დავიტოვოთ, რომ ჩვენი მოწინააღმდეგე არის ჩვენი ხელისუფლება, მაგრამ ვხედავთ იმ რეალობასაც, რომ ჩვენი ხელისუფლება სინქრონში არის ჩვენს წინააღმდეგ რუსულ იმპერიალიზმთან და კრემლთან ერთად,“- აცხადებს აქციის ერთ-ერთი ორგანიზატორი მიშა მშვილდაძე.
მსვლელობის შემდეგ, საღამოს შვიდ საათზე პროტესტი პარლამენტის წინ გაგრძელდება. მათი განცხადებით, აქცია შს მინისტრის გადადგომამდე არ დაიშლება.