ზუგდიდის ყინულის სახლის ტერიტორია გაიყიდა. მიწა სამშენებლო კომპანია m2- მა 7 270 118 ლარად შეიძინა.ინფორმაციას მერიაში ადასტურებენ.
„ზუგდიდში თეატრის ქუჩაზე მდებარე არასასოფლო-სამეურნეო დანიშნულების მიწის ნაკვეთი საინვესტიციო ვალდებულებებით 7 270 118 ( შვიდი მილიონ ორას სამოცდაათი ათას ას თვრამეტი) ლარად m2-მა შეიძინა. ელექტრონული აუქციონის პირობებად განისაზღვრა საპრივატიზებო უძრავი ქონებაზე 8 000 000 (რვა მილიონი) ა.შ.შ დოლარის ექვივალენტი ლარში ინვესტიციის განხორციელება, 80 ნომრიანი საერთაშორისო სტანდარტების ბრენდული სასტუმროს მშენებლობა. ზუგდიდის მუნიციპალიტეტის მერია მიწის ნაკვეთის გასხვისების მომენტიდან 6 (ექვსი) თვის ვადაში უზრუნველყოფს მიწის ნაკვეთებზე განთავსებული შენობა-ნაგებობისა და დანადგარების დემონტაჟს. შემძენი ვალდებულია სასტუმროს მშენებლობა დაასრულოს მშენებლობის ნებართვის გაცემიდან 30 (ოცდაათი) თვის განმავლობაში“- განაცხადეს მერიაში.
ტერიტორიის გასხვისებას საზოგადოების ნაწილი მხარს არ უჭერდა და ამ მოტივით რამდენჯერმე საპროტესტო აქციაც გაიმართა, თუმცა საკრებულომ ტერიტორია საპრივატიზაციო ნუსხაში ხმაურისა და დაპირისპირების ფონზე შეიტანა.