მსგავსი შემთხვევა ჩვენს ისტორიაში არ ყოფილა, რომ მოქმედი პარლამენტის წევრისთვის აღეძრა სისხლის სამართლებრივი დევნა ხელისუფლებას – ასე ეხმაურება „ნაციონალური მოძრაობის“ წევრი, სალომე სამადაშვილი პროკურატურის მიერ გაკეთებულ განცხადებას, რომლის თანახმადაც, დეპუტატ ნიკა მელიას წინააღმდეგ სისხლის სამართლებრივი დევნა დაიწყო.
სალომე სამადაშვილი აცხადებს, რომ ასეთი რეპრესიული პოლიტიკის მქონე მთავრობა, რომელიც დღეს საქართველოს ჰყავს, ქვეყანა დამოუკიდებლობის ისტორიაში არ ახსოვს.
„დღეს საქართველოს პარლამენტში დაიწყო პროცედურა ჩვენი ქვეყნის ისტორიაში პირველად, პარლამენტის წევრისთვის იმუნიტეტის მოხსნის თაობაზე. მსგავსი შემთხვევა ჩვენს ისტორიაში არ ყოფილა, რომ მოქმედი პარლამენტის წევრისთვის აღეძრა სისხლის სამართლებრივი დევნა ხელისუფლებას. ეს თავისთავად, უკვე მეტყველებს ერთადერთ რამეზე, რომ მსგავსი რეპრესიული პოლიტიკური სისტემა ამ ქვეყანას დამოუკიდებლობის მოპოვების შემდეგ არ ჰყოლია“ – განაცხადა სალომე სამადაშვილმა.
„ნაციონალური მოძრაობის“ დეპუტატი ამბობს, რომ ბიძინა ივანიშვილმა ღიად თქვა, რომ შს მინისტრს, გიორგი გახარიას, თანამდებობას არ დაატოვებინებს.
„გარდა ამისა, დღეს, საქართველოს პარლამენტში, გავრილოვის ჩამოსვლაზე, ასევე პასუხისმგებელი ადამიანი, როგორც იყო კობახიძე, დანიშნა ივანიშვილმა თავისი მორიგი მარიონეტი აირჩიეს პარლამენტის სპიკერად და ქართველ ხალხს დასცინა ბიძინა ივანიშვილმა და უთხრა, რომ, რა თქმა უნდა, გახარია არსად არ წავა. მოსკოვის მიერ დანიშნული შს მინისტრი რჩება ადგილზე, გავრილოვის ჩამომყვანიერთი პირი ჩაანაცვლეს მეორე პირად, ქვეყნის საკანონმდებლო ორგანოს თავმჯდომარედ და გავრილოვთან დაპირისპირებული ოპოზიციის წარმომადგენელი, ის, ვინც ფიზიკურად დაუპირისპირდა გავრილოვის მიერ ჩვენი პარლამენტის სპიკერის სავარძლის დაკავებას და განაცხადა, რომ მე არ შემოვუშვებ კობახიძეს აქ, სანამ არ გადადგება, ეს ადამიანი გახდა სისხლის სამართლის პასუხისმგებლობის დევნის ქვეშ და საპარლამენტო იმუნიტეტის მოხსნის შესაძლო მსხვერპლი,“ – განაცხადა სალომე სამადაშვილმა.