პარლამენტში ვითარება უკიდურესად დაიძაბა – დეპუტატები ერთმანეთს ფიზიკურად დაუპირისპირდნენ.
ოპოზიცია ითხოვდა დღის წესრიგში დამდგარიყო შს მინისტრის, გიორგი გახარიას თანამდებობიდან გადაყენების საკითხი, რაზეც მმართველმა გუნდმა უარი განაცხადა.
ოპოზიციამ სხდომათა დარბაზი პროტესტის ნიშნად დატოვა.
დაპირისპირება მამუკა მდინარაძის გამოსვლას მოჰყვა, რომელმაც ოპოზიცია 20 ივნისის მოვლენების პროვოცირებაში დაადანაშაულა.
„გინდათ გადატრიალება ამ ქვეყანაში, ნიკა მელია, დაჯექი, შენ ხარ მთავარი უბედურება ამ ქვეყნის მიხეილ სააკაშვილთან ერთად“- მიმართა მამუკა მდინარაძემ ნიკა მელიას.
მისი თქმით, პარლამენტში ოპოზიცია დესტრუქციულ ქმედებებს აგრძელებს. მდინარაძემ ოპოზიციის ლიდერებს მოუწოდა პასუხისმგებლობა აიღონ 20 ივნისს განვითარებულ მოვლენებზე.
„პასუხისმგებლობა აიღეთ იმაზე რაც გააკეთეთ, რასაც აკეთებთ და რასაც მოჰყვა ის საშინელება რაც ხდება ქვეყანაში. ხმას დაუწიეთ, არ მოგწონთ ხო ეს ამბავი? რაც გააკეთეთ,როგორ ისარგებლეთ ადამიანების გულწრფელი ემოციით, როგორ ისარგებლეთ, როგორ გინდათ დესტრუქცია და გადატრიალებები ამ ქვეყანაში,“-მამუკა მდინარაძემ მიმართვა ვერ დაასრულა, რადგან დეპუტატები ერთმანეთს დაუპირისპირდნენ.