2020 წლის საპარლამენტო არჩევნების პროპორციული წესით ჩატარებაზე ოპოზიციის ლიდერები დღეს კონსულტაციებს გამართავენ.
ხელისუფლების ოპონენტები სამოქმედო გეგმას შეიმუშავებენ. მათი თქმით, იმსჯელებენ ამ მოდელის რა ფორმა სჯობია საქართველოსთვის მოსალოდნელი დარღვევების თავიდან ასაცილებლად.
„მოვაგროვეთ 300 ათასი ხელმოწერა, შევიტანეთ პარლამენტში. ჰგონია ოლიგარქს, რომ რაღაც ხრიკები გაუვა, მაგრამ სინამდვილეში ჩვენ ვაპირებთ, რომ ჩვენი ძალიან მყარი პოზიციით წარვდგეთ. რეალურად უნდა ვთქვათ, რომ პროპორციული სისტემა, ამ ადამიანებმა დაათმობინეს, ჩვენ ყველამ ერთად დავათმობინეთ,“-განაცხადა ხატია დეკანოიძემ.
რაც შეეხება ნულოვან ბარიერს, ოპოზიციის ნაწილი გარკვეულ რისკს ხედავს და არ გამორიცხავს, რომ ამ საკითხზე კონსულტაციებიც გაიმართოს.
„დღეს უკვე საჭიროა კოორდინირებული მოქმედება, რომ მათ შორის ეს მონაპოვარი რაც გვაქვს ბოლომდე მივიყვანოთ და რა თქმა უნდა საჭიროა პოზიციების კოორდინაცია. ჩვენი ვალდებულება არის, რომ ფართო სპექტრთან საზოგადოების ვიყოთ კონსულტაციაში, რომ ეს დანაპირები რომელიც მოგვცა ივანიშვილმა, რომელიც გამოვტყუეთ ივანიშვილს, ახლა ლოგიკურად მივიყვანოთ კონსტიტუციურ ცვლილებამდე,“-აცხადებს სერგი კაპანაძე.