ზუგდიდის მუნიციპალიტეტის საკრებულოს წევრებისა და საჯარო მოხელეების ნაწილი შს მინისტრს გიორგი გახარიას მხარდაჭერას უცხადებს. მათ ხელი მოაწერეს შესაბამის პეტიციას და სოციალურ ქსელში გააზიარეს. ხელმომწერები მოითხოვდნენ არ გადადგეს შს მინისტრი გიორგი გახარია, თუმცა რამდენიმე წუთის წინ Manifest.ge-მ პეტიცია წაშალა. Manifest.ge-ს ადმინისტრაციამ პეტიცია ცოტა ხნის წინ წაშალა და განმარტებები გააკეთა.

“20 ივნისს შსს-მ დაშალა პარლამენტთან გამართული აქცია, სადაც მათ დაარღვიეს ადამიანის უფლებები, მათ იძალადეს ახალგაზრდებზე, უკანონოდ დააკავეს ადამიანები.

ამ საიტზე არასდროს დაიდება პეტიცია, რომელიც უპირისპირდება ადამიანს, ადამიანის უფლებებს და იცავს მოძალადეს“, – ნათქვამია ონლაინ პლატფორმის განცხადებაში.

ჩვენმა კოლეგებმა რადიო ,,ათინათიდან” მოასწრეს პეტიციის მისი ხელმომწერების დაფოქსირება. ხელმომწერებს შორის იყვნენ საკრებულოს თავმჯდომარე მამუკა წოწერია, მისი მოადგილე ბესიკ ჭეჟია, საკრებულოს წევრი კონსტანტინე კაკავა, მერიის ახალგაზრდულ საქმეთა განყოფილების წარმომადგენელი დავით შამათავა, მერიის ააიპ “ხელოვნებისა და კულტურის განვითარების ცენტრის” თანამშრომელი თემო კიკალეიშვილი და სხვები.

აქვე შეგახსენებთ, რომ ზუგდიდის საკრებულოს თავმჯდომარის მოადგილემ, თავისი სკანდალური განცხადებებით ცნობილმა თაზო ფაცაციამ 20 ივნისის ღამეს დაშავებულ ერთერთ ახალგაზრდას გადასანერგად თავისი თვალი შესთავაზა. მან ერთერთი ინტერნეტმომხმარებლისგან იქვე მიიღო პასუხი, რომ ეს ბავშვები ცალი თვალით უფრო კარგად ხედავენ, ვიდრე მისი თვალის გადანერგვის შემთხვევაში დაინახავდნენ, მით უფრო, რომ, თუ ფაცაცია თვალს დაითხრის, მხოლოდ ქართული ოცნებისათვის….

საქმე რომ მხოლოდ ფაცაციაში იყოს… რა ეშველება ზუგდიდის საჯარო მოხელეთა ერთ ნაწილში გაბატონებულ ფარისევლობასა და მაამებლობას? – საკითხავი აი, ეს არის