რუსული ესტრადის მომღერალი და რუსეთის საზოგადოებრივი პალატის წევრი დიანა ღურწკაია თბილისში მომხდარ მოვლენებს გამოეხმაურა და თქვა, რომ საქართველოს მოსახლეობის უმეტესი ნაწილი დადებითად და მეგობრულად არის რუსების მიმართ განწყობილი.
“მე დღეს დავბრუნდი საქართველოდან, სადაც მამა მოვინახულე. მინდა გითხრათ, რომ კოლოსალური განსხვავებაა დემონსტრანტებსა და ქვეყნის მოსახლეობის უმეტეს ნაწილს შორის”. მისი თქმით, სტუმართმოყვარეობა ქართველების ერთ-ერთი დამახასიათებელი თვისებაა და “სტუმრისადმი არაპატივსაცემო დამოკიდებულება სირცხვილად ითვლება”.
“ჩემთან ქუჩაში ერთი კაცი მოვიდა, რომელიც უნივერსიტეტის მასწავლებელი აღმოჩნდა და რომელმაც მითხრა, რომ თუკი მთავრობას არა აქვს ტაქტი და გაგება, მაშინ მას პირადად სურს ბოდიში მოიხადოს. მე, როგორც ქართველი, ვუერთდები მის სიტყვებს და ყველა მართლმადიდებელ ძმებს და დებს ბოდიშს მოვუხდი, რომელთა ღონისძიება (დასვენება) ჩაიშალა” – მომღერლის სიტყვებს რუსული “ვზგლიადი” ციტირებს.
ფაქტს მწერალი ზვიად კვარაცხელია გამოეხმაურა.” საერთოდაც მგონია, რომ ძალიან დიდ მნიშვნელობას ვანიჭებთ ამ სოსო პავლიაშვილების, დიანა ღურწკაიების, ქეთა თოფურიების, დათო ხუჯაძეების, აჩი ფურცელაძეებისა და სხვა ქართველ “მოსკოველთა მოსკორილს”. არაფერს ისინი ქართული და არც მით უმეტეს საერთაშორისო კულტურის თვალსაზრისით არ წარმოადგენენ. ჰოდა, ნუ გამოიყვანთ ავანსცენაზე, იყონ თავისთვის, სამშობლო მაგათ არ ანაღვლებთ და თავის საქმეში კიდე საშუალოზე დაბალი რანგისა არიან. ” -წერს ზვიად კვარაცხელია.