სამოქალაქო პროტესტი გრძელდება – მოქალაქეები ავტოკოლონით და საყვირებით თბილისის ქუჩებში მსვლელობას მართავენ და შს მინისტრის, გიორგი გახარიას გადადგომას ითხოვენ.
საპროტესტო მსვლელობა რესპუბლიკის მოედნიდან დაიწყო და რუსთაველის გამზირისა და სანაპიროს გავლით საბოლოო დანიშნულების ადგილისკენ შინაგან საქმეთა სამინისტროსკენ მიემართება.
ისინი შსს-სთან რამდენიმე წუთით გაჩერდებიან და საყვირების დახმარებით დააფიქსირებენ პროტესტს.
“ყველას გვინდა გავაგებინოთ, რომ ძალადობა უნდა დასრულდეს ამ ქვეყანაში,” – განაცხადა აქციის ერთ-ერთმა მონაწილემ.
გიორგი გახარიას გადადგომა ერთ-ერთი მთავარი მოთხოვნაა, რასაც პარლამენტის წინ შეკრებილი მოსახლეობა ითხოვს. ისინი სისხლიანი ღამის გამო მოძალადეების დასჯას და დაკავებული მომიტინგეების გათავისუფლებასაც ითხოვენ.