რუსთაველის გამზირზე გამოსვლებს მხარდაჭერას უცხადებენ ქართველი სპორტსმენები. თბილისის ლოკომოტივისა და რუსთავის მატჩში ლოკომოტივის ფეხბურთელებმა, დავით ჯიქიამ და ოთო კობახიძემ ცალ თვალზე ხელის აფარებითაქციის მონაწილეებს მხარდაჭერა გამოუცხადეს და გაამხნევეს.
ფეხბურთელებს ასევე მაისურზე ჰქონდათ წარწერა: “გვახსოვს, რომ საქართველოს 20% ოკუპირებულია.”
საქართველოს 20 წლამდე მორაგბეთა ნაკრების წევრმა თედო აბჟანდაძემ იტალიასთან მატჩის დროს გამოხატა სოლიდარობა და გატანილი დარტყმის შემდეგ ცალ თვალზე ხელი აიფარა.
“რუსეთი ოკუპანტია, განვიცდი თბილისში მიმდინარე მოვლენებს” – ამ ტექსტით twitter-ზე გამოეხმაურა მიმდინარე მოვლენებს საქართველოს ფეხბურთელთა ეროვნული ნაკრების ვიცეკაპიტანი, გურამ კაშია.
შეგახსენებთ, რომ 20 ივნისს, აქციის დარბევის დროს სპეცრაზმის მიერ ნასროლი რეზინის ტყვიების შედეგად ორმა მოქალაქემ თვალი დაკარგა. მას შემდეგ დემონსტრანტების ნაწილი რუსთაველის გამზირზე სოლიდარობის ნიშნად თვალახვეული მიდიან.