პატრიარქის ქორეპისკოპოსი ეხმაურება ჭყონდიდელი მიტროპოლიტის განცხადებას იმის შესახებ, რომ 20 ივნისის ღამეს, დარბევის დროს ქაშვეთის ტაძარი დაკეტილი იყო.
მეუფე იაკობის თქმით, ტაძარი ღია იყო და მეუფე პეტრე “ჯობია ჭკვიანად იყოს”.
ბოდბელმა მთავარეპისკოპოსმა ტელეკომპანია პირველის ეთერში თავად დარეკა და განცხადების გაკეთება ისურვა.
“მეუფე პეტრემ, როგორც ყოველთვის, დღესაც მოიტყუა. თითქოს წუხელ დაკეტილი იყო ქაშვეთის დაძარი, როცა ღია იყო. უშუალოდ ჩემი კონტროლის ქვეშ იყო და ღია იყო, რომ იცოდეთ რა… ჰოდა, მეუფე პეტრეს ვისგან აქვს მაგ ინფორმაცია ხო? ახალაიებისგან თუ კიდე ვისგან, ვერ გეტყვით. ჯობია ჭკვიანად იყოს და თავის საქმეს მიხედოს, ეპარქიაში ჩავიდეს და… როცა ჩამოდის თბილისში, პატრიარქისგან კურთხევა აიღოს, ან პატრიარქის ქორეპისკოპოსებისგან. ისე უფლება არა აქვს, მასე რომ გამოდის და კეკლუცად ლაპარაკობს”, – ამბობს მეუფე იაკობი.
პატრიარქის ქორეპისკოპოსი აღნიშნავს, რომ ტაძარი 26 მაისსაც თვითონ გააღებინა, ისევე, როგორც 20 ივნისს. მეუფე პეტრეს მისამართით კი მეუფე იაკობი ამბობს, რომ “იცის რაც დაემართება”.
“მაგას თუ უნდა რაღაც პოპულარობის მოხვეჭა ხო? ჩემთან ურთიერთობაში იცის რაც დაემართება. არავის არ ვემუქრები, მაგრამ იცის რაც დაემართება. პოდიუმი არ არის მაგი რომ 50 ჩამოსულ ადამიანთან ერთად იაროს აქეთ-იქით. აღარ ვაპატიებ უწმინდესის ასეთ შეურაცხყოფას, იცოდეს ყველამ”, – აღნიშნა პატრიარქის ქორეპისკოპოსმა.