ევროსაბჭოს საპარლამენტო ასამბლეის წევრმა საქართველოს პრემიერს ასამბლეის სხდომაზე სიტყვით გამოსვლის შემდეგ კითხვა დაუსვა და განაცხადა , რომ შეშფოთება არსებობს იმასთან დაკავშირებით, რომ არჩევნების წინ 600 000 მოქალაქისთვის სესხების დაფარვა ამომრჩევლის მოსყიდვას წარმოადგენდა.
„არანაირი კავშირი სესხების დაფარვას ამომრჩევლის მოსყიდვასთან არ აქვს. – ასე უპასუხა პრემიერმა ამ კითხვას – არჩევნებამდე ერთი წლით ადრე მე, როგორც ფინანსთა მინისტრმა მოვახდინე ამ საკითხის ინიცირება. როგორც პრემიერ-მინისტრმა აგვისტოში განვაცხადე, რომ ეკონომიკურ ცხოვრებაში ვერ მონაწილეობდა 600 ათასზე მეტი ადამიანი, რადგან ისინი „შავ სიაში“ იყვნენ. ეს პროგრამა იყო ძალიან წარმატებული და ნება მომეცით გავიმეორო, რომ ეს არანაირად არ იყო დაკავშირებული არჩევნებთან. ჩვენ ამ პროგრამაზე გაცილებით ადრე განვაცხადეთ, ვიდრე არჩევნები ჩატარდებოდა“, – განაცხადა საქართველოს პრემიერ-მინისტრმა.
ევროსაბჭოში მამუკა ბახტაძეს საქართველოს ტერიტორიიდან გაუჩინარებული აზერბაიჯანელი ჟურნალისტის აფგან მუხთარლის გატაცების საქმესა და მიმდინარე გამოძიებაზეც დაუსვეს კითხვა.
„გაგიგზავნიათ თუ არა ოდესმე თქვენი ელჩი აზერბაიჯანში აფგან მუხთარლის მდგომარეობის გასაგებად და ჩაგიტარებიათ თუ არა ოდესმე გამოძიება მის გატაცებაზე“, – ჰკითხა ევროსაბჭოს საპარლამენტო ასამბლეის წევრმა მამუკა ბახტაძეს.
როგორც საქართველოს პრემიერ-მინისტრმა დასმული კითხვის პასუხად განაცხადა, აფგან მუხთარლის თემა ძალიან სენსიტიური საკითხია. მან ასევე დასძინა, რომ აფგან მუხთარლის საქმეზე გამოძიება მიმდინარეობს და ის შეფასებას მხოლოდ გამოძიების დასრულების შემდეგ გააკეთებს