"თიბისი კაპიტალმა" უძრავი ქონების ბაზარი შეისწავლა. კვლევამ აჩვენა, რომ ახალი საბანკო რეგულაციების შემდეგ, იპოთეკური სესხების ოდენობა წინა წლის მონაცემებთან შედარებით 47%-ით შემცირდა. ასევე ახალი სამშენებლო რეგულაციების ამოქმედებამ, საცხოვრებელი უძრავი ქონების მშენებლობაზე გაცემული ნებართვები 45%-ით შეამცირა.
“შევისწავლეთ, საკმაოდ დიდი სტატისტიკური ინფორმაცია დავაგროვეთ უძრავ ქონებასთან დაკავშირებით. მთლიანად საქართველოში, განსაკუთრებით თბილისზე და ბათუმზე გავაკეთეთ აქცენტი და გვინდა ჩვენს პარტნიორებს გავუზიაროთ ჩვენი ხედვა დღეს სად არის უძრავი ქონების ბაზარი,“ – განაცხადა "თიბისი ბანკის" გენერალურმა დირექტორმა ვახტანგ ბუცხრიკიძემ.
"თიბისი ბანკის" გენერალური დირექტორის მოადგილემ გოგა თხელიძემ აღნიშნა, რომ საბანკო რეგულაციებმა ზრდის მაჩვენებლებზე შესაძლოა დროებითი შეფერხება გამოიწვიოს, თუმცა მოსახლეობის მსყიდველუნარიანობის ზრდა სახეზეა.
„დღევანდელ კვლევაზე წარვადგენთ როგორც წარსული ზრდის მაჩვენებლების შეფასებას ჩვენსას და ასევე მომავალზე ხედვას. ძალიან მნიშვნელოვანი ფაქტორებია ის, რომ ემიგრანტების წილი ზრდაში მატულობს. რეგულაციებმა შესაძლებელია, რომ გარკვეული შეფერხება დროებითი მაინც გამოიწვიოს ზრდაზე, მაგრამ ასევე მნიშვნელოვანია მსყიდველუნარიანობის ზრდა მოსახლეობის, რაც სახეზე არის და ეს პოზიტიურად აისახება. ჩვენ ვფიქრობთ, რომ ზრდა იქნება სექტორში, ამაში ბანკების და სექტორის როლი იქნება ძალიან მნიშვნელოვანი მომავალი 2-3 წლის განმავლობაში,“ – აცხადებს გოგა თხელიძე.