მამუკა ხაზარაძემ წინასწარ იცოდა იმ საფრთხეების შესახებ, რომელიც ხელისუფლებამ მის ბიზნესს შეუქმნა.
ამას ადასტურებს 12 თებერვალს „თიბისი ბანკის“ დამფუძნებლის განცხადება, რომელიც მან კავკასიის უნივერსიტეტის სტუდენტებთან შეხვედრის დროს გააკეთა.ვიდრე ეროვნული ბანკი მამუკა ხაზარაძისა და ბადრი ჯაფარიძის „თიბისიდან“ ჩამოშორებას მოითხოვდა, ერთი დღით ადრე ხაზარაძემ ღიად ისაუბრა მოსალოდნელ საფრთხეებზე.
ის მიუთითებდა, რომ ბიზნესის დაცვა საქართველოში უამრავ პრობლემასთან არის დაკავშირებული, მათ შორის ერთ-ერთია, როგორც თავად ამბობს, „ჩინოვნიკების თავხედობა“.მსხვილი ფინანსური ინსტიტუტის დამფუძნებელი ამბობს, რომ ქვეყნის შიგნით არიან ადამიანები, რომლებიც ებრძვიან პროგრესს. ხაზარაძის თქმით, ამიტომ მას ყველაზე მეტად სწორედ შიდა საფრთხეების ეშინია.
„რატომ არსებობს დღესაც ამხელა ჯგუფი იმიტომ, რომ არცერთ პოლიტიკურ პარტიასთან, ან ე.წ. სახურავებთან არ გვქონია გარიგება. ეს არის მნიშვნელოვანი რამე. ესეც სწორედ იმის გამოძახილია, რომ ჩვენ ვართ თავისუფალი ხალხი და არასდროს არავის არ გავურიგებდით იმის გამო, რომ ვიღაცამ გვითხრას, ჩვენ შეგიქმნით სასათბურე პირობებს. ერთია, რომ ჩვენნაირი ტიპის ქვეყანაში შექმნა ბიზნესი და მეორე არის, დაიცვა ეს ბიზნესი. სამწუხაროდ, ჯერ კიდევ შორს ვართ ბიზნესის კლასიკური დაცვისგან. ამას პრობლემა აქვს, სასმართლო სისტემის გაუმართაობა, ბევრი რაღაც, ჩინოვნიკების თავხედობა ხშირად. ჩვენთან ისტორიულად ყოველთვის არის ადამიანთა რაღაც ჯგუფი, რომელიც, რატომ მე ვერ გავიგე, მაგრამ ეწინააღმდეგება პროგრესს, ან ეომება პროგრესს, ან ებრძვის. მე გარეთა საფრთხეების კი არ მეშინია, არამედ შიდა საფრთხეების უფრო მეშინია, როგორც ქართველს,“- განაცხადა მამუკა ხაზარაძემ.
ეროვნულმა ბანკმა მოითხოვა, რომ "თიბისი ბანკის“ დამფუძნებლებს, მამუკა ხაზარაძეს და ბადრი ჯაფარიძეს ხელმოწერის უფლება შეუჩერდეთ და სამეთვალყურეო საბჭოდან გაიწვიონ.