ეკა ბესელიას პირადი ცხოვრების ამსახველი ვიდეომასალის გავრცელებაზე პრემიერი ისევ დუმს. დღეს ბოლო დროის ყველაზე სკანდალურ საქმეზე საუბარს მთავრობის მეთაურმა თავი აარიდა.
მინისტრთა კაბინეტის წევრები კი აცხადებენ, რომ ისინი გამოძიების შედეგებს ელოდებიან. ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი ამბობს, რომ მისთვის, ისევე როგორც მთავრობის მთლიანი შემადგენლობისთვის, მსგავსი ფაქტები მიუღებელია.
„აუცილებელია ობიექტურად დადგინდეს ეს ყველაფერი და ამის შემდეგ შეიძლება უკვე შეფასებების გაკეთება. 2012 წლიდან დაწყებული არაერთხელ დაადასტურა საქართველოს მთავრობამ, რომ ეს მისთვის მიუღებელია. ათასობით ჩანაწერი საჯაროდ განადგურდა და დამოკიდებულება ამ საკითხისადმი არის ერთიანი და ცალსახა რომ ეს არის მიუღებელი,“-განაცხადა დავით სერგეენკომ.
„ქართული ოცნების“ საპრალამენტო ფრაქციის თავმჯდომარე მამუკა მდინარაძე კახი კალაძის მსგავსად ეჭვქვეშ აყენებს რეალურად ჰქონდა თუ არა გავრცელებას ადგილი. მისი განცხადებით ჯერ ეს უნდა დადგინდეს და დადასტურების შემთხვევაში კი გამოძიებამ უნდა დაადგინოს ვის მიერ მოხდა გავრცელება:
"პირველ რიგში აუცილებლად უნდა დადგინდეს საერთოდ ჰქონდა თუ არა გავრცელების ფაქტს ადგილი და თუ ასეთი დადასტურდება, გამოძიებას აქვს ვალდებულება, რომ უმოკლეს დროში დაადგინოს ვინ გააკეთა ეს ყველაფერი…
იყო კონკრეტული ქეისები, მე შეგნებულად არ დავასახელებ იმ შემთხვევებში დაზარალებულების ვინაობას, როდესაც მართლმსაჯულება განხორციელდა და დამნაშავე პირები დაისაჯნენ. აქედან გამომდინარე, ნუ ვიტყვით, რომ არავინ დასჯილა მსგავს ფაქტებთან დაკავშირებით" განაცხადა მამუკა მდინარაძემ.
,,თუ აქ სიმართლის რაიმე ნიშანწყალი მაინც არის, ცხადია, რომ ეს აბსოლუტურად არანორმალური და უკიდურესად აღმაშფოთებელია'' აცხადებს საპარლამენტო უმრავლესობის წევრი გია ჟორჟოლიანი.
"კონკრეტულად ამის შესახებ ჯერჯერობით ცოტაა ცნობილი, მაგრამ თუ აქ რაიმე სიმართლის ნიშანწყალი მაინც არის, ცხადია, რომ ეს აბსოლუტურად არანორმალური და უკიდურესად აღმაშფოთებელია. სრულად, ზედმიწევნით, დეტალურად უნდა იქნას გამოძიებული და უნდა დაისაჯოს ის ხალხი, თუ ასეთი რამ განხორციელდა. მეორე – საზოგადოებაში აბსოლუტურად შეუწყნარებელი დამოკიდებულება უნდა იყოს ამის მიმართ, ხოლო ის თუ საიდან განხორციელდა, ეს გამოძიებამ უნდა დაადგინოს," – განაცხადა ჟორჟოლიანმა.
რაც შეეხება თავად ეკა ბესელიას , იგი მისი პირადი ცხოვრების ამსახველი კადრების გავრცდლების პასუხად აცხადებს, რომ მის წინააღმდეგ ბინძური მეთოდებით იბრძვიან, რაზეც ყველა საკადრისს პასუხს მიიღებს.
ეკა ბესელია მისი პირადი ცხოვრების ამსახველი კადრების გავრცელების შემდეგ, სამომავლო გეგმებზე საუბარს დღეს აპირებს, – მისი თქმით, დღეს პარლამენტში საკუთარ გეგმებზე ისაუბრებს, თუმცა არ დაუკონკრეტებია რა დროს გამართავს ბრიფინგს..