წყალტუბოს საკრებულოს თავმჯდომარის, გრიგოლ ივანეიშვილის და ვაკის გამგებლის მოადგილის, თეიმურაზ ჩოჩუას აღკვეთის ღონისძიების ზომებზე სასამართლო იმსჯელებს. გამოძიება ივანეიშვილს ინვესტორისგან ქრთამის სახით 250 000 ლარის აღებას, ხოლო ჩოჩუას შუამავლობას ედავება. არცერთი ბრალდებული თავს დამნაშავედ არ ცნობს.
პროკურატურა ბრალდებულების მიმართ აღკვეთის ღონისძიების სახით პატიმრობას ითხოვს, ვინაიდან საქმის პროკურორის, ელიზბარ გოზალიშვილის განცხადებით, მათი მხრიდან მოწმეებზე ზემოქმედების საფრთხე არსებობს.
„არსებობს როგორც ფარული აუდიო-ვიდეო ჩანაწერები, რა თქმა უნდა, ასევე არსებობს მოწმეების ჩვენებები, რომლებიც ერთობლიობით ადასტურებენ აღნიშნული პირების მიერ ჩადენილ დანაშაულს. ეს მოწმეები არიან როგორც უცხოელი ბიზნესმენი, ინვესტორი, ასევე საკრებულოს თანამშრომლები. მუნიციპალიტეტის თანამშრომლები გვაწვდიან ინფორმაციას, თუ როგორ ინტერესდებოდა გრიგოლ ივანეიშვილი აღნიშნული აუქციონის ჩატარებით და მისი დაინტერესება დასტურდება სწორედ ამ მოწმეების ჩვენებებით,“ – აცხადებს პროკურორი ელიზბარ გოზალიშვილი.
ადვოკატი ამბობს, რომ ბრალდებულების მხრიდან არანაირ კანონდარღვევას ადგილი არ ჰქონია. უფლებადამცველი ბრალდებულების მიმართ აღკვეთის ღონისძიების სახით გირავნობის შეფარდებას ითხოვს, რომელიც 400 ათასი ლარით არის განსაზღვრული.
„მუნიციპალიტეტმა გადაწყვიტა, რომ ეს უძრავი ქონება გაესხვისებინა. იქამდე, სანამ კონკრეტული აგენტი გამოჩნდებოდა ამ სისხლის სამართლის საქმეში უკვე ამ წელიწადში ორჯერ იყო ეს ქონება გატანილი. შესაბამისად, აღნიშნული დაკავშირებული არ არის ჩემი დაცვის ქვეშ მყოფის ავტორიტეტთან, რომ, თითქოს, ჩემი დაცვის ქვეშ მყოფის, ასე ვთქვათ, მთავარი მოთხოვნით განხორციელდა ამ კონკრეტული ქონების გატანა. არცერთი მტკიცებულებით არ დასტურდება, რომ ჩემი დაცვის ქვეშ მყოფს ჰქონდა ავტორიტეტი, გაესხვისებინა ტენდერი. აქ მთავარი არის, კანონმდებლობით მას რისი საშუალება ჰქონდა. რაც შეეხება ყველა დანარჩენს, რა თქმა უნდა, წარმოდგენილია საქმეში ასევე მტკიცებულებები, რომელიც ადასტურებს, რომ ჩარიცხული 250 ათასი ლარი მას არ აუღია, იგი სესხად აიღო,“ – აცხადებს ადვოკატი