აფხაზი პოეტი ნიკა ბაძაღუა, რომელიც სოხუმში ცხოვრობს და ხშირად სტუმრობს ზუგდიდსა და მთელ საქართველოში, წერს ლექსებს აფხაზურ, ქართულ, მეგრულ, სვანურ ენებზე, და აფხაზებსა და ქართველებს შორის წაშლილი ბილიკების გაკაფვას ცდილობს, თავის პირად ფეისბუქგვერდზე ამაღელვებელ პოსტს აქვეყნებს.
,,კახეთში გახლდით რამოდენიმე დღე და ისეთი ემოციებით დავიმუხტე, – ჯერ ვერ გადმოგცემთ, სანამ არ დავიცლები…
დავიდ გარეჯში (საგარეჯოში) კახელებმა კახურ სუფრის თავზე – სუფრის უფლად დამსვეს…
ჩემმა მასპინძელმა და მეგობარმა, – სოსო კირვალიძემ, თავის სამეგობრო წრეში, თავისივე კისერი მანდო ჩემი თამადად დანიშვნით და ღვთის წყალობით გამოუჭრელი დარჩა იგი მას!
რამდენი მოვეფერეთ ერთმანეთს! მიყვარხართ კახელებო! მიყვარხარ კახეთო!
მარტო მამა ლაზარეს გამოჩენილი ყურადღება ჩემს მიმართ მთელი ცხოვრება მიღირს (ნათლობა ჰქონდა ნახევარ საათში, მან კი,- როცა გაიგო აფხაზი პოეტი სტუმრობს დღეს კახეთსო , დრო გამონახა, მოვიდა, ცოტაც გამოვესაუბრეთ ერთმანეთს, დამლოცა, სამი ჭიქა ღვინოც დავლიეთ ერთად და სასწრაფოდ გაიქცა მადლიანი საქმის გასაკეთებლად)…
პოეზიის ტაძარს დავამსგავსეთ კახური სუფრა…
გავიხსენეთ საქართველო-აფხაზეთის სიყვარულით გაჟღენთილი ორი დიდი პოეტის ძმობა და მარადიული ხსენებაც ვთქვით ივანე თარბასი და გოგლა ლეონიძესი…
სუფრის ბოლოს ჩემმა მასპინძელმა მითხრა :
– რა კარგი ხარ ნიკოლოზ! ნეტავ ორი იყო, ერთი რომ სულ თან გატაროო!
P.S.
ახლა არ მიკვირს, თუ რატომ იყო ივანე თარბა გოგლას ხშირი სტუმარი!'' წერს ნიკა ბაძაღუა