ეკა ბესელია: მშვიდობაში კაბინეტები და თანამდებობები – დამითმია მათთვის, ვინც პოლიტიკაში თუ ხელისუფლებაში ამ მიზნით მოვიდა

0
366
 
ეკა ბესელიას  შეფასებით, გუნდში ადგილი აქვს არა ძველებისა და ახლების დაპირისპირებას, არამედ ფასეულობათა და ღირებულებათა შორის წინააღმდეგობას.
 
„ვიდრე ბატონი ირაკლი კობახიძე ახლა იმ კაბინეტთან დგას და, ასე მგონია, იცავს იმ კაბინეტის თემას, მე გავაგრძელებ იმ ფასეულობებისა და ღირებულებებისთვის ბრძოლას და მის დაცვას, რისთვისაც იმ კაბინეტზეც და ბევრ უკეთეს კაბინეტზეც უარი მითქვამს და კიდევ ვიტყვი, იმიტომ, რომ არ არის არც ერთი კაბინეტი და არც ერთი თანამდებობა საპირწონე ისეთი სახელმწიფოებრივი მნიშვნელობის თემების, როგორიც არის სამართლიანობა და შენი, ჩემი და ჩვენი ქვეყნის მომავლის და ჩვენი შვილების მომავლის გარანტიების შექმნა“, – განაცხადა ბესელიამ. „ტვ პირველის“ ეთერში
 
რაც შეეხება ვიცე-სპიკერის ვაკანტურ თანამდებობაზე გადასვლის შეთავაზების იდეას, ეს  ირაკლი კობახიძისგან მოდის, მაგრამ ამ იდეის მოფიქრების დროს ის ალბათ მარტო არ იყო,- ეს იყო მცდელობა იმისა, რომ ჩემი კომიტეტის თავმჯდომარეობიდან წასვლის მომხიბვლელი გზა ეჩვენებინათ, რაზეც მაშინაც გამეღიმა და ვთქვი, რომ თანამდებობები არ მაინტერესებს და პოლიტიკაში კომფორტისთვის არ მოვსულვარ. კომფორტის ზონიდან მაშინ გავედი, როცა თავისუფალი პროფესია მქონდა და მხოლოდ ჩემს თავს ვეკუთვნოდი. ვიყავი ადვოკატი და წავედი ბრძოლის ველზე. ვთქვი, რომ ჩემთვის კომფორტის ზონაში გადასვლა საინტერესო არ არის. ვთქვი, რომ მზად ვარ, საერთოდ წავიდე პოლიტიკიდან, საერთოდ წავიდე სახლში, მაგრამ უნდა ვიყო დარწმუნებული, რომ ეს სამართლიანობის იდეას არ გაამრუდებს და კომიტეტს არ დავტოვებთ, მაგალითად ვანო ზარდიაშვილის ხელში“, – განაცხადა ეკა ბესელიამ.
 
 
“არასდროს გავხდები იმ პარლამენტის თავმჯდომარის მოადგილე, რომელსაც ამ პრინციპულ საკითხებთან და ფასეულობებთან დაკავშირებით სახელმწიფოებრივი პოზიცია არ ექნება. მშვიდობაში კაბინეტები და თანამდებობები – დამითმია მათთვის, ვინც პოლიტიკაში თუ ხელისუფლებაში ამ მიზნით მოვიდა. ჩემთვის წყალგამყოფია თემა, რომელიც ჩვენი შვილების მომავალს უკავშირდება“, – აღნიშნა ბესელიამ.
 
პარლამენტის იურიდიულ საკითხთა კომიტეტის თავმჯდომარე იმასაც ამბობს, რომ ის და მისი მეგობრები ყველაფერს გააკეთებენ, რომ პარლამენტში იუსტიციის უმაღლესი საბჭოს მიერ წარდგენილი მოსამართლეთა სია არ დამტკიცდეს. ბესელიამ კიდევ ერთხელ აღნიშნა, რომ სია პარლამენტიდან გასაწვევია.
წინა სტატიაირაკლი კობახიძის განცხადებით, შესაძლოა დავით ჭიჭინაძის მსგავსად, პარტიიდან ეკა ბესელიაც გაირიცხოს
შემდეგი სტატიაგიგი უგულავა: “მორიგი სირცხვილი საქართველოს მთავრობისგან. ამათ მართმადიდებლობა ეკლესიაში ჩოხაში გამოწყობილი დგომა ჰგონიათ”
ტელეკომპანია ოდიშის საინფორმაციო სამსახური