ზუგდიდის მერიის ზედამხედველობის სამსახურის უფროსმა ლაშა ჯაიანმა თანამდებობა დატოვა.
მერიის პრესსამსახურში ადასტურებენ, რომ მან უკვე დაწერა განცხადება, რომელშიც გადადგომის მიზეზად ოჯახური პირობები დაასახელა.
თუმცა ვრცელდება არაოფიციალური ინფორმაცია, რომ მისი მერ პოსტის დატოვება სავარაუდო კორუფციულ გარიგებებს უკავშირდება.
“საერთაშორისო გამჭვირვალობა-საქართველოს“ ინფორმაციით, ზუგდიდის მერიის ზედამხედველობისა და არქიტექტურის სამსახურის უფროსის ლაშა ჯაიანის ყოფილმა კომპანიამ, შპს “ევრომშენი 999-მა“, 2016-2018 წლებში, 70-ზე მეტ ტენდერში მიიღო მონაწილეობა, რომელთაგან 39 შემთხვევაში გაიმარჯვა. ორგანიზაციის შეფასებით, შპს “ევრომშენი 999-ის” მიერ ტენდერებში გამარჯვება და არსებული გარემოებები წარმოშობს ეჭვს , რაზეც ზუგდიდის მუნიციპალიტეტმა უნდა გასცეს სრულყოფილი და ამომწურავი პასუხი
საერტაშორისო გამწვირვალობამ მოუწოდა სახელმწიფო აუდიტის სამსახურს შეისწავლოს შპს “ევრომშენი 999-ის” მიერ ზუგდიდის გამგეობისა და ზუგდიდის მერიის მიერ გამოცხადებულ ტენდერებში გამარჯვების კანონიერების საკითხი
.13 დეკემბერს მედიასთან საუბარში ლაშა ჯაიანმა განაცხადა, რომ კორუფციის ნიშნებს ვერ ხედავს იმაში, რომ მისი ყოფილი კომპანია ტენდერების ხშირი გამარჯვებულია. მით უფრო, რომ კომპანია მანამდე გადასცა სხვას, ვიდრე საჯარო სამსახურში თანამდებობაზე დაინიშნებოდა.
“გავეცანი ამ ინფორმაციას, სამჯერ მაქვს გადაკითხული. თუ კორიფციის ნიშნებს ხედავენ არსებობს შესაბამისი ორგანოები და მათ უნდა გამოიძიეონ ეს საკითხები. მე ვერ ვხედავ კორუფციის ნიშნებს. ეს კომპანია ჩემს დანიშვნამდე იყო გასხვისებული და მე ვერ ვაიძულებდი ტენდერებში არ მიიღოთ მონაწილეობა მეთქი. ეს არის გამჭვირვალე. ოფიციალურ გვერდზე იტვირთება ყველა დოკუმენტაცია და გაკეთებული სამუშაოები. თუ რამე დარღვევაა და თუ რამე კორუფციაა, ალბათ შესაბამისი სამსახური გასცემს პასუხს“, – განაცხადა ლაშა ჯაიანმა.