ზუგდიდის მერიის დაკავებული მაღალჩინოსნის, თენგიზ ქობალიას ადვოკატის სოსო ჯანაშია პროტესტს გამოთქვამს იმის გამო, რომ მას საგამოძიებო მოქმედებებში მონაწილობა არ მიაღებინეს.
„, ანტიკორუფციული სააგენტოს თანამშრომლები ჩემს მიმართ აგრესიულები იყვნენ და არ შემიშვეს ოთახში, სადაც საგამოძიებო მოქმედებას აწარმოებდნენ. როგორც განმიცხადეს, არ შემიშვეს იმ მოტივით, რომ უკვე დაწყებული იყო მოქმედებები და მე დავაგვიანე.. ფაქტობრივად ადვოკატს საგამოძიებო მოქმედებაში მონაწილეობა არ მიმაღებინეს. ასეთი შემთხვევა ჩემს პრაქტიკაში არ მქონია“, – აღნიშნა სოსო ჯანაშიამ.
ჯანაშია აცხადებს, რომ ჯერჯერობით მისთვის არ გადაუციათ ოფიციალური ინფორმაცია თუ რას ედავებიან თენგიზ ქობალიას.
სახელმწიფო უსაფრთხოების სამსახურმა, ჩატარებული ოპერატიულ-სამძებრო და საგამოძიებო მოქმედებების შედეგად, დანაშაულის შეუტყობინებლობისა და ცრუ ჩვენების მიცემის ფაქტებზე ზუგდიდის მუნიციპალიტეტის მერიის ეკონომიკური პოლიტიკისა და სერვისების მართვის სამსახურის უფროსი თენგიზ ქობალია და მოქალაქე ხუტა ბ. დააკავეს.
სუს-ის ინფორმაციით, ზუგდიდის მერიის ქონების მართვის სამსახურის უფროსი მერის და ვიცე-მერის მიერ ჩადენილი დანაშაულის შეუტყობინებლობის გამო დააკავეს, ხოლო მოქალაქე – გამოძიებისთვის განზრახ არასწორი ინფორმაციის მიწოდების გამო..