კარტოფილი, ხახვი, ფქვილი, ზეთი და შაქარი საარჩევნოდ – პროდიუქტების ეს ჩამონათვალი დღეს ბარამიას ქუჩაზე დევნილთა ახალ ჩასახლებაში „ქართული ოცნების“ აქტივისტებმა და დევნილთა სამმართველოს წარმომადგენლებმა მიიტანეს. როგორც ირკვევა, პროდუქტი წინასწარ შედგენილი სიის მიხედვით უნდა დარიგებულიყო, თუმცა სიტუაცია მას შემდეგ აირია, რაც ადგილზე გაერთიანებული ოპოზიციის შტაბის წევრები მივიდნენ. შტაბის წევრების გამოჩენის შემდეგ კი, როგორც შტაბის უფროსმა ანა წითლიძემ „ოდიშინიუსს“ განუცხადა, ზედამხედველები მიიმალნენ და დევნილებმა პროდუქტი თვითონვე გაინაწილეს. „როგორც კი ჩვენ მივედით, გაიქცნენ და ხალხმა დაიტაცა პროდუქტი, იძახდნენ, რამდენი კილო ხახვიც არ უნდა დაარიგონ, ავიღებ და ამათ ხმას როგორ მივცემო, იძახდნენ“- გვითხრა წითლიძემ. დევნილები ამბობენ, რომ მათთან დასახლებაში წინასწარ მივიდნენ, პირადობები მოთხოვეს და შემდეგ დაურეკეს რომ მისულიყვნენ და წაეეღოთ პროდუქტი. „აქამდე არ გავხსენებივართ და ახლა გავახსენდით, ვნახე იმ კაცს ეკავა სია, გამოვართვი და ვნახე, ვისაც ეწერა ოცნება, ალბათ მხარდამჭერი იგულისხმებოდა, იმას აძლევდნენ უფრო მეტს ყველაფერს“- განაცხადა ერთ-ერთმა დევნილმა.