შს მინისტრს პარლამენტში უმცირესობა იბარებს. მთავარი საკითხი, რაზეც მათ მინისტრისგან პასუხის მოსმენა სურთ, ხორავას ქუჩის საქმეზე პარლამენტის საგამოძიებო კომისიის რეკომენდაციების შესრულებაა. მაგრამ როგორც ირკვევა მინისტრი პარლამენტში მისვლას არ აპირებს, ყოველ შემთხვევაში მიმდინარე კვირას მაინც.

 

,,როგორც ჩანს, შინაგან საქმეთა მინისტრს გიორგი გახარიას პარლამენტში მოსვლა არ უნდა, რადგან სხვა რამებით არის დაკავებული – ეს სხვა რამეა ზუგდიდში საარჩევნო თემების მოგვარება, – ამის შესახებ „ინტერპრესნიუსს“ საპარლამენტო უმცირესობის ერთ-ერთმა ლიდერმა სერგი კაპანაძემ განუცხადა.

 

როგორც კაპანაძემ განმარტა, გიორგი გახარია პარლამენტში მიწვეულია საპარლამენტო უმცირესობის ფორმატში და უმცირესობა მზად არის, ნებისმიერ დროს შეხვდეს მას.

 

კაპანაძემ ხაზგასმით აღნიშნა, რომ ამ მხრივ დასაზუსტებელი და შესათანხმებელი არაფერია და ყველაფერი მინისტრზეა დამოკიდებული.

 

„გიორგი გახარია პარლამენტში დაბარებულია უმცირესობის სხდომაზე, უმცირესობა მზად არის მიიღოს ნებისმიერ დღეს, მაგრამ როგორც ჩანს, მოსვლას არ აპირებს. სხვა რა არის შესათანხმებელი, ჩვენთვის სრულიად გაუგებარია“, – განაცხადა სერგი კაპანაძემ.

 

 

შეგახსენებთ როგორც ეს  პარლამენტის თავმჯდომარეს ირაკლი კობახიძემ 19 ნოემბრის ბიუროს სხდომაზე დააანონსა, მიმდინარე კვირას  შს მინისტრი გიორგი გახარია პარლამენტში სავარაუდოდ, აღარ მივა.

 

ბიუროს სხდომაზე კობახიძემ განაცხადა, რომ შს მინისტრთან შეხვედრა მიმდინარე კვირას გაიმართებოდა და მან კოლეგებს კონკრეტულ თარიღზე შეთანხმება შესთავაზა, თუმცა გახარიას პარლამენტში მისვლის თარიღსა და ფორმატზე კონსულტაციები პარლამენტში ამ დრომდე არ გამართულა.