საშიშროებამ გადაიარა, სპილო გრანდს მეორე ეშვი ამოუღეს, იგი ნარკოზიდან გამოვიდა და ვოლიერშიც გასეირნეს

0
349
სპილო გრანდისთვის ეშვის ამოღების სამსაათიანი ოპერაცია წარმატებით განხორციელდა და სპეციალისტებმა სპილო უკვე ფეხზე წამოაყენეს. იგი ვოლიერში დამოუკიდებლად გადაადგილდება. სპილო გრანდი ამ წუთებშიც სპეციალისტების დაკვირვების ქვეშ იმყოფება.
 
ოპერაცია ღია ცის ქვეშ, ვოლიერში ჩატარდა. ოპერაციის დასაწყისში კამერებსა და ფოტოგრაფებს საშუალება მისცეს 15 წუთით პროცესი გადაეღოთ.
 
უცხოელი ვეტერინარების შერჩევაში თბილისის ზოოპარკის ხელმძღვანელობას „ბი ბი სი“ დაეხმარა. ადგილზე იმყოფება BBC-ის გადამღები ჯგუფი, რომელიც ამ ოპერაციისა და თბილისის ზოოპარკის შესახებ ერთსაათიან ფილმს გადაიღებს.
 
 
 
„ოპერაციამ ბრწყინვალედ ჩაიარა. ჩვენმა მეგობრებმა, სამხრეთ აფრიკელმა ვეტექიმებმა ბრწყინვალედ იმუშავეს. გრანდი თავს კარგად გრძნობს, ფეხზეა. გართობის ხასიათზეა, ანუ ყველაფერმა კარგად ჩაიარა, თუმცა, შემდეგი დღეები მოვლა და ყურადღება სჭირდება, რათა ჭრილობა არ გაურთულდეს. რა თქმა უნდა, მოვლას არ მოვაკლებთ", – ამის შესახებ ჟურნალისტებს თბილისის ზოოპარკის დირექტორმა ზურაბ გურიელიძემ განუცხადა.

 
სპილო გრანდს ერთი ეშვი 2014 წელს ამოუღეს და მაშინ ოპერაცია 11 საათს გაგრძელდა –  სპილოს ძალიან გაუჭირდა ანესთეზიის შემდეგ გამოსვლა . ამჯერად ოპერაციამ უფრო სწრაფად გაიარა და არც გრანდმა ,,ისურვა'' დიდხანს ძილი.
 
რატომ დასჭირდა გრანდს ესოდენ რთული ოპერაციები?
 
1999 წლის ნოემბერში, როცა სპილო მოსკოვის ზოოპარკიდან ერევნის ზოოპარკში გადაჰყავდათ, გრანდი სულ პატარა, 4 წლის იყო. გზაში კონტეინერი ამოტრიალდა. ერთი შეხედვით სპილოს დაზიანებები არ ემჩნეოდა, მაგრამ როგორც მოგვიანებით აღმოჩნდა, ინციდენტის შედეგად ეშვები მოიტეხა. ერევნის ზოოპარკში ჩასულს, რამდენიმე ხნის შემდეგ, სისხლდენა დაეწყო, მოგვიანებით კი ორგანიზმის დაინფიცირების საფრთხეც გაჩნდა. ჰოლანდიელმა ვეტექიმებმა დაადგინეს, რომ ჭრილობებში ჩირქი იყო დაგროვილი და ინფექციის გავრცელების თავიდან ასაცილებლად ეშვების ყოველდღიური გამორეცხვა გახდებოდა საჭირო.
 
2014 წელს გრანდი თბილისში ჩამოიყვანეს და მალევე დაიგეგმა ურთულესი ოპერაცია. სპილოს ეშვები ყბის ძვალთან იმდენად ახლოს ჰქონდა მოტეხილი, რომ ამ მდგომარეობაში ცხოველის დიდი ხნით დატოვება დაუშვებელი იყო. ორგანიზმში მუდმივი ანთებითი კერის არსებობას, დროთა განმავლობაში, შესაძლოა მისი დაღუპვა გამოეწვია. ამიტომაც, სპილოს ჯანმრთელობისა და სიცოცხლის შესანარჩუნებლად, ოპერაციის გაკეთება და მოტეხილი ეშვების ამოღება გადაწყდა. გამომდინარე იქიდან, რომ ოპერაცია გართულდა და დაგეგმილზე მეტი დრო გაგრძელდა, მხოლოდ ერთი ეშვის ამოღება მოხერხდა. ახლა ეს ამოცანაც დაძლეულია, გრანდს არცერთი ეშვი არა აქვს , მაგრამ  აღარაფერი შეაწუხებს და, რაც მთავარია ფეხზეა. და ეს ძალიან ახარებს ამ საყვარელი არსების გულშემატკივრებს

წინა სტატიალილოში ერთმანეთს ოთხი სატრანსპორტო საშუალება შეეჯახა. არიან დაშავებულები
შემდეგი სტატია“ძალადობის სამარცხვინო გაპრავება”- ასე აფასებენ ოპოზიციის წევრები ხელისუფლების რეაქციას ახალქალაქში მომხდარ თავდასხმაზე
ტელეკომპანია ოდიშის საინფორმაციო სამსახური