როგორი გამყალბებლებიც არიან არჩევნების, ისეთი გამყალბებლები არიან კვლევების,- ამის შესახებ გაერთიანებული ოპოზიცია „ძალა ერთობაშიას" საპრეზიდენტო კანდიდატმა გრიგოლ ვაშაძემ, „ქართული ოცნების" ახალი კვლევის შედეგების კომენტირებისას განაცხადა.
„ამაზე არსებობს ზრდილობიანი და ძალიან ზრდილობიანი პასუხი. ზრდილობიანი პასუხი არის ის, რომ როდესაც შულერებთან გაქვს საქმე, უნდა იცოდე, რომ შულერებს ყოველთვის დანიშნული ბანქოს დასტა უდევთ ჯიბეში. ძალიან ზრდილობიანი პასუხი არის ის, რომ როგორი გამყალბებლებიც არიან არჩევნების, ისეთი გამყალბებლები არიან კვლევების. ეს არის კანონსაწინააღმდეგო ქმედება და ნორმალური ხელისუფლების პირობებში ამის გამკეთებლები დაისჯებოდნენ სასტიკად",- განაცხადა ვაშაძემ.
პარტია „ქართული ოცნება“ სოციოლოგიური კვლევის ახალ შედეგებს აქვეყნებს, რომლის მიხედვითაც, მათ მიერ მხარდაჭერილი პრეზიდენტობის კანდიდატი სალომე ზურაბიშვილი 54 %-იანი მხარდაჭერით არჩევნებს პირველივე ტურში იგებს. მორიგი კვლევის შედეგები საზოგადოებას ფრაქცია „ქართული ოცნების“ თავმჯდომარე მამუკა მდინარაძემ გააცნო.