ამ დრომდე უცნობია გაიწვევს თუ არა მთავრობა კანაფის კულტივაცია/ექსპორტის შესახებ კანონს პარლამენტიდან. საპატრიარქოს მხრიდან მწვავე შეფასებების მიუხედავად, მმართველი გუნდი გადაწყვეტილებას მაინც არ იღებს და ამბობს, რომ პროექტის განხილვა შეჩერებულია. დეპუტატების თქმით, საკითხზე ფართო კონსულტაციები დაიწყება. გაწვევის შესახებ გადაწყვეტილება კი მხოლოდ მას შემდეგ მიიღება, რაც საზოგადოება შეთანხმდება იმაზე, რომ აღნიშნული საკითხი დღის წესრიგში აღარ უნდა დადგეს. „საკითხი დღის წესრიგში აღარ დგას და არის ერთი პარტია და მისი პროპაგანდისტული ფილიალი, ტელევიზიის სახით, რომელიც მუდმივად ცდილობს, რომ ეს საკითხი დღის წესრიგში იყოს. გაიწვევენ მაშინ, როდესაც პრაქტიკულად ყველა, საზოგადოება შეთანხმდება იმაზე, რომ ეს არის თემა, რომელიც დღის წესრიგში აღარ უნდა დადგეს,“-განაცხადა ვიცე-სპიკერმა გია ვოლსკიმ. დღევანდელ ბიუროზე „ნაციონალური მოძრაობა“ დააყენებს ინციატივას, რაც შეიძლება მალე დაიწყოს საკანონმდებლო ორგანომ მარიხუანას კულტივაცია-ექსპორტის შესახებ პროექტის გაწვევაზე მსჯელობა. „მთავრობა უნდა გაიწვიოს იგი. დღემდე არავითარი მოთხოვნა არ ყოფილა. უფრო მეტიც, პარლამენტში აცხადებენ, რომ ეს კანონპროექტი არის შეჩერებული. რაც იმას ნიშნავს, რომ პარლამენტი ისევ დაუბრუნდება მის განხილვას,“-აცხადებს რომან გოცირიძე. კანაფის კულტივაცია/ექსპორტის შესახებ კანონს აკრიტიკებენ „ევროპული საქართველოს“ წევრებიც. პარტიაში ამბობენ, რომ ეს არის კანონი, რომელიც არავის სჭირდება