პრეზიდენტ გიორგი მარგველაშვილს ხშირად ახასიათებს არაეთიკური გამონათქვამები, ის თავისი პირით თუ თანაშემწეების მეშვეობით არა მხოლოდ ეთიკის ნორმებს არღვევს ხშირად, არამედ უზრდელობაც არა ერთხელ მოგვისმენია პირადად მისი ან მისი თანაშემწეების მხრიდან, – ასე გამოეხმაურა საქართველოს პარლამენტის თავმჯდომარე ირაკლი კობახიძე პრეზიდენტის განცხადებას – „წინასაარჩევნო კურიოზად ჩავთვალოთ, რომ საპრეზიდენტო არჩევნებში „ქართული ოცნება“ უპარტიო კანდიდატს ასახელებს“

 

. პრეზიდენტი ცდილობს, არაეთიკური გამოთქმებით ჩრდილი მიაყენოს „ქართული ოცნების“ იმიჯს, თუმცა ამას ის, ბუნებრივია, ვერ ახერხებს ხოლმე –ასეთია ირაკლი კობახიძის რეაქცია გიორგი მარგველაშვილის განცხადებაზე. საქართველოს პრეზიდენტმა „ქართული ოცნების“ მხრიდან უპარტიო კანდიდატის დასახელება „წინასაარჩევნო კურიოზად " მოიხსენია. ირაკლი კობახიძე პარალელს ავლებს ლიეტუვასთან და ამბობს, რომ დალია გრიბაუსკაიტე სწორედ ამ ფორმით არის არჩეული.

 

„ლიეტუვას პრეზიდენტი გრიბაუსკაიტე არის ზუსტად ასეთი სახით არჩეული. პირველ ჯერზე ის იყო დამოუკიდებელი კანდიდატი. მას მხარი დაუჭირა მაშინდელმა მმართველმა პარტიამ რესპუბლიკურმა პარტიამ და ასე გახდა ის პრეზიდენტი. ამაში კომიკური არაფერი არ არის. სამწუხაროდ პრეზიდენტი ცდილობს ხოლმე ასეთი არაეთიკური გამოთქმებით რაღაცნაირად ჩრდილი  მიაყენოს „ქართული ოცნების“ იმიჯს თუმცა ამას ის ბუნებრივია ვერ ახერხებს,“-განაცხადა ირაკლი კობახიძემ.

 

პარლამენტის თავმჯდომარე ამბობს, რომ „ქართული ოცნებისთვის“ არ იქნება გამოწვევა დაასახელებს თუ არა გიორგი მარგველაშვილის თავის კანდიდატურას. ირაკლი კობახიძე არც მეორე ტურის ჩატარებას გამორიცხავს.