ამ წუთებში ზუგდიდში ზაზა სარალიძის მხარდასაჭერი აქცია მიმდინარეობს. სამოქალაქო სექტორის მიერ ორგანიზებული აქცია „ნუ მომკლავ!“ ცენტრალური ბულვარის ტერიტორიაზე 18:00 საათზე დაიწყო, რომელიც არასამთავრობო სექტორის წარმომადგენლებისა და სამოქალაქო საზოგადოების მიერ სოციალური ქსელის საშუალებით დაიგეგმა.
აქციის მონაწილეების თქმით, დღეს აქ გამოვიდნენ იმიტომ რომ გვერდში დაუდგნენ შვილმკვდარ, გაუბედურებულ ოჯახს. აქციის მონაწილეებს ხელში უჭირავთ ტრანსპარანტები: „ნუ მომკლავ“, „გადადგეს მთავრობა“ „ გადადგეს შოთაძე“. აქციის მონაწილეებმა ფეხით მსვლელობა გამართეს ზუგდიდის საოლქო პროკურატურასთან, სადაც პოლიტიკური პარტიების წარმომადგენლები და თავისუფალი მოქალქეები არიან შეკრებილი.აქციის ორგანიზატორების თქმით, ეს არის სრულიად აპოლიტიკური აქცია, სადაც ერთიანია ყველა და სრულად იზიარებს ზაზა სარალიძის ტკივილს.
