შენი თავისუფლებისთვის! – ამ ლოზუნგით აქცია პარლამენტის წინ ღამის კლუბებში წუხელ ჩატარებული სპეცოპერაციების პასუხად დაინიშნა. შეძახილებით, ტრანსფარანტებითა და მაღლა აწეული ხელებით ასეულობით ახალგაზრდა რუსთაველის გამზირზე პოლიციის ძალადობის გასაპროტესტებლად შეიკრიბა. ბასიანსა და გალერიში ავტომატიანი სპეცდანიშნულების რაზმის წარმომადგენლების შევარდნის გამო, აქციის ორგანიზატორებმა ხელისუფლებას პოლიტიკური პასუხისმგებლობის აღებისკენ მოუწოდეს და კონკრეტული მოთხოვნები წაუყენეს.აქციის მონაწილეები მათი მოთხოვნების დაკმაყოფილებამდე რუსთაველის გამზირის დატოვებას არ აპირებენ.
აქციის მონაწილეები დედაქალაქის მერს დუმილის გამო საყვედურობდნენ. რუსთაველზე შეკრებილებს მიაჩნიათ, რომ კალაძის წინასაარჩევნო მთავარი დაპირება ღამის ქალაქის განვითარებასთან დაკავშირებით, მითი აღმოჩნდა.
აქციაზე რიგითი მოქალაქის სტატუსით სხვადასხვა არასამთავრობო ორგანიზაციების წარმომადგენლები იმყოფებოდნენ.
არასამთავრობოთა წარმომადგენლებს მიაჩნიათ, რომ პოლიციამ ძალას გადაამეტა და კლუბში შეკრებილების მიმართ ძალადობა გამოამჟღავნა. მათთვის ასევე გაუგებარია, რა საჭირო იყო ავტომატიანი სპეცდანიშნულების წარმომადგენლების კლუბების ტერიტორიაზე შევარდა, თუ ე.წ. ნარკორეალიზატორების შესახებ ინფორმაციას ისინი სამი თვის განმავლობაში ფლობდნენ.
აქციაზე დღეს ტურისტებიც იმყოფებოდნენ.