ევროკავშირის სადამკვირვებლო მისია ზუგდიდში შუმანის დეკლარაციის 68-ე წლისთავს აღნიშნავს. ღონისძიება მარათონით გაიხსნა, რომელიც ბულვარის მიმდებარე ტერიტორიიდან დაიწყო. მარათონის დასრულებამდე ქალაქის მთავარ ხეივანზე მოძრაობა ავტომობილებით შეიზღუდა.ზუგდიდის საველე ოფისის ინფორმაციით, წელს განსაკუთრებული ყურადღება დაეთმობა ადმინისტრაციული სასაზღვრო ზოლის სოფლებს. 9 მაისს ევროკავშირის მისია პირველი საჯარო სკოლის ეზოში სხვადასხვა სპორტულ და კულტურულ ღონისძიებას გამართავს. 68 წლის წინ, 1950 წლის 9 მაისს, მაშინდელმა საფრანგეთის საგარეო საქმეთა მინისტრმა, რობერტ შუმანმა, გადადგა პირველი ნაბიჯი იმ ორგანიზაციის შექმნისკენ, რასაც დღეს ევროკავშირს ვუწოდებთ. 9 მაისს, შუმანის დეკლარაციის პრინციპების გათვალისწინებით, ევროკავშირის სადამკვირვებლო მისია აღნიშნავს ევროპის დღეს.