ვარდების რევოლუციის მოედანს შესაძლოა, ძველი სახელი – რესპუბლიკის მოედანი დაუბრუნდეს. ინიციატივის შესახებ დღეს საკრებულოს სახელდებისა და სიმბოლიკის კომისიის სხდომაზე იმსჯელებენ. გადაწყვეტილებას საკრებულო პირველი რესპუბლიკის გამოცხადებიდან 100 წლის იუბილეს უკავშირებს, თუმცა ეს ინიციატივა თვითმმართველ ორგანოში ჯერ კიდევ გასულ წელს, ყოფილმა დეპუტატმა თედო კობახიძემ დაარეგისტრირა.
ოპოზიცია ინიციატივას რევანშად აფასებს.
"რევანშის სურვილით ხელისუფლებამ გადაწყვიტა,მ რომ ვარდების მოედანს, რომელსაც ვარდების რევოლუციის საპატივსაცემოდ ჰქვია ეს სახელი, იმ რევოლუციის საპატივსაცემოდ, რომელმაც ჭაობიდან ამოიყვანა ეს ქვეყანა და სწორ რელსებზე დააყენა და განვითარების სწორ გზაზე დააყენა, რევანში გამოუცხადოს მიხეილ სააკაშვილს და ვარდების მოედანს გადაარქვას სახელი,"- აცხადებს "ნაციონალური მოძრაობის" წევრი, მარიკა დათუკიშვილი.
ვარდების რევოლუციის მნიშვნელობაზე საუბრობენ "ევროპულ საქართველოშიც" და უმრავლესობის ინიციატივას "სამარცხვინოს" უწოდებენ.
"ვარდების რევოლუცია იყო მოვლენა, როცა ქართველმა ხალხმა ვერ მოითმინა შეურაცხყოფა, არჩევნების გაყალბების, მისთვის თავისუფალი ნების წართმევა, ამის მერე ძალიან ბევრი ის ცვლილება განახორციელა, რომელსაც სხვათაშორის ქართული ოცნებაც აღიარებს და საერთაშორისო ფორუმებზე თავს იწონებს. ეს მცდელობა ისტორიის გადაწერის არის ძალიან სამარცხვინო ვიწრო პარტიული ქმედება,"-აცხადებს გოკა გაბაშვილი.